Shechambo: Hakikisheni Kaya Zote Zina Vyoo

Imewekwa : February 22nd, 2024

Benton Nollo na Shadida Salum, TTC

Watendaji wa Mitaa, Wenyeviti wa Mitaa pamoja na Wajumbe wa Kamati ya Usafi wa Mazingira – CLTS katika Halmashauri ya Mji Tunduma wametakiwa kuhakikisha kuwa kila Kaya katika Halmashauri hiyo inakuwa na choo bora na kukitumia ili kujikinga na magonjwa ya mlipuko.

Rai hiyo imetolewa na Afisa Afya wa Halmashauri hiyo, Pendo Shechambo alipikuwa akizungumza na viongozi hao kutoka katika Kata 7 za Halmashauri ya Mji Tunduma wakati wa kikao cha pamoja na Timu ya Maafisa Afya wa Halmashauri hiyo kilichofanyika kwa nyakati tofauti kwenye Ukumbi wa Shule ya Msingi Danida na Ukumbi wa Kituo cha Afya Tunduma tarehe 22 Februari 2024 kwa lengo la kuimarisha kampeni ya usafi wa mazingira.

Kikao kilichofanyika kwenye Ukumbi wa Shule ya Msingi Danida kilijumuisha wajumbe kutoka Kata za Sogea, Maporomoko, Kaloleni na Tunduma huku kile kilichofanyika kwenye Ukumbi wa Kituo cha Afya Tunduma kulijumuisha Wajumbe wa Kata za Muungano, Mwakakati na Makambini.

Shechambo amewaasa Wenyeviti na wajumbe wa Kamati ya CLTS kuhakikisha kuwa hakuna kaya au taasisi ambayo inakosa choo safi na salama na kuhamasisha Wananchi kunawa mikono kwa maji tiririka na sabuni ili kuepuka magonjwa ya mlipuko kama vile Kipindupindu, majonjwa ya matumbo, Ugonjwa wa Jicho Jekundu na UVIKO 19.

“Magonjwa yote ya mlipuko yanayotokea kipindi hiki ni magonjwa yanayotokana na uchafu…tukiweza kuhamasisha jamii yetu vizuri wakafahamu umuhimu wa kutumia choo safi na kusafisha mazingira yao tutaweza kuepuka magonjwa haya.” Alisema Shechambo na kuongeza;

“Mtu akiumwa typhod au kipindupindu tafsiri yake ni kuwa mtu huyo amekula kinyesi…usione fahari kuumwa magonjwa hayo maana yake ni kuwa wewe ni mchafu tuchemshe maji ya kunywa na kuyachuja vizuri kabla ya kunywa.”

Naye,  Afisa Afya, Bakari Ibrahim amebainisha sifa za Choo bora ni kile chenye sakafu inayosafishika, kiwe na paa, kiwe na kuta imara, kiwe na mlango unaofunga ndani na njee, kiwe na maji ya kutawazia kwa ndani na kiwe na maji tiririka na sabuni kwa ajili ya kunawa mikono kwa nje.

“Tunafanya kampeni ya kukagua vyoo ili kuona ubora wa vyoo tulivyonavyo maana ili kupambana na magonjwa ya mlipuko ni lazima kuwa na vyoo bora na siyo bora choo tu.” Alisema Ibrahim na kuongeza;

“Wakati tunaweka mazingira mazuri ya vyoo kwenye kaya tuzingatie na taasisi zetu kama shule, ofisi za watendaji, makanisa na misikiti kuwa na vyoo bora”.

Mwaka 2012 hadi 2013 Wizara ya Afya kwa kushirikiana na Wadau ilianzisha kampeni ya kitaifa iitwayo Kampeni ya Usafi wa Mazingira (National Sanitation Campaign) ambayo ilikuwa na lengo la kupunguza jamii za watu ambao hawatumii vyoo bora.

Vilevile, mpaka kufika mwaka 2030 Tanzania kama nchi nyingine ulimwenguni inatakiwa kuhakikisha kuwa hakuna kaya ambayo haipati maji safi na salama pamoja na kuwa na mazingira safi hii ni kwa mujibu wa Lengo Namba 6 la Malengo ya Maendeleo Endelevu (SDGs) ya mwaka 2015 ambayo Tanzania ilisaini mkataba wake.

Matukio katika Picha: