SHEREHE ZA UTIAJI SAINI KATI YA TBA NA TUNDUMA ZAFANYIKA

Imewekwa : June 27th, 2022

Halmashauri ya Mji Tunduma imeingia mkataba na mkandarasi mshauri kwa ajili ya kuandaa michoro ya ujenzi wa jengo la ghorofa moja la Hospitali ya Mji Tunduma

Mkataba huo umesainiwa leo tarehe 27/06/2022 katika Ofisi ya Mkurugenzi wa Halmashauri ya Mji Tunduma kati ya Halmashauri ya Mji Tunduma na Wakala wa majengo Tanzania (TBA)

Jengo la ghorofa linalotakiwa kujengwa litakuwa na WODI zote za WANAUME, WANAWAKE NA WATOTO pamoja na Vyumba vya Upasuaji.

Mkurugenzi wa Halmashauri ya Mji Tunduma Bwana Philemon Magesa amewaambia wawakilishishi wa wakala wa majengo Tanzania kwamba Halmashauri inaimani na TBA na inajua kuwa wanauwezo wa kufanya kazi hiyo kwa weledi kwani hata ile ya jengo la OPD ambalo kwa sasa limeshaanza kufanya kazi michoro yake ilichorwa na TBA

“Sina shaka na uwezo wenu TBA ila ninachowaomba mjitahidi sana kazi hii iishe ndani ya mkataba kama tunavyo saini leo, wananchi wa Tunduma wanahaja sana na Hospitali hivyo mkijitahidi kukamilisha hata kabla ya muda tuliokubaliana wa miezi miwili itakuwa bora Zaidi” alisema Magesa

Katika maelezo yake Mwakilishi wa TBA Mhandisi Fidelis Cosmas ambaye ni mhandisi wa miradi kwa Mkoa wa Songwe amesema kazi hiyo itakamilika kabla ya wakati kwani anajua jinsi wananchi wanavyo pata tabu katika Huduma za Afya

“Tutafanya kazi usiku na mchana kuhakikisha kuwa kazi zote tunazikamilisha kwani TBA ina wataalamu wa kila Idara katika Ujenzi hivyo kazi hii itaisha kwa wakati” alisema Mhandisi Cosmas

Mkataba huu imesainiwa leo kwa makubaliano ya kufanyika kazi hiyo kwa muda wa miezi miwili yaani mwezi JUAI na AGOSTI. Hivyo mwanzo ni Julai 01, 2022 na mwisho ni Agosti 30, 2022

Naye mwanasheria wa Halmashauri ya Mji Tunduma Adv. Frank Sikalengo amewataka TBA kutii na kuheshimu mkataba uliosainiwa leo kwani wakikiuka sio tu watakuwa wameikosea Halmashauri bali pia wameikosea Serikali ya Jamhuri ya Muungano wa Tanzania ya Awamu ya sita inayoongozwa na Mhe. Rais Samia Suluhu Hassan yenye nia ya kuwasaidia wananchi katika sekta ya Afya.