SHIRIKA LA RESTLESS DEVELOPMENT TANZANIA LATOA ELIMU TUNDUMA

Imewekwa : September 2nd, 2022

Shirika la Restless Tanzania lenye kazi ya Kushauri, Kulea na Kuunganisha maelfu ya vijana kuongoza mabadiliko ya vijana nchini Tanzania kupitia Mradi wake wa “Kijana Wajibika” limefika katika Halmashauri ya Mji Tunduma, Wilayani Momba kwa lengo la kuelimisha jamii hususani vijana kuhusiana na kazi mbalimbali  zinazofanywa na shirika hilo kama uongozi kwa vijana, kutokomeza tatizo la ukeketaji kwa wanawake, kutokomeza ukatili wa kijinsia, Stadi za Maisha na ujasiliamali.

Wakati wa utoaji wa elimu hii Shirika hili kupitia vijana wa wajibikaji limetumia muda huo kuzungukia maeneo mbalimbali kama Shule za Msingi na sekondari, Vituo vya afya na Zahanati, Vikundi vya wanawake ambalo ndilo kundi kubwa linalokumbwa na tatizo la ukatili  wa kijinsia sambamba matatizo ya afya ya uzazi.

Mojawapo ya kazi zilizoelezwa na shirika hili ni Pamoja na utoaji wa elimu dhidi ya ukeketaji ambapo Wanawake na Watoto wa kike wengi ambao hawajasoma ndio wanaonyanyasika dhidi utamaduni huu wa ukeketaji kwani huonekana kutokuwa na mchango wa kiuchumi katika jamii zao hivyo huishi Maisha ya kimaskini na kuendelea kunyanyasika.

“ Tabia hii imekuwa ikirithiwa kutoka kizazi hadi kizazi huku ikitumiwa kama njia ya kuandaa Watoto wa kike kuelekea utu uzima kitendo ambacho si sahihi kinatakiwa kutokomezwa kwani madhara yatokanayo na ukeketaji ni makubwa na ya muda mrefu. “

Aidha ,Shirika hili limemulika tatizo kubwa la Ukatili wa kijinsia na kuitaka jamii kutofumbia macho matukio yanafanana na tukio hili kwani vitendo vya kikatili vinatokea katika maeneo mbalimbali ikiwemo katika ngazi ya kaya, mahali pa kazi, maeneo ya biashara kama masoko,mashuleni na mahali pengine katika jamii zetu.

 Hivyo ili kufanikisha usawa wa kijinsia kwa jamii ya watanzania Serikali kwa kushirikiana na mashirika yasiyo ya kiserikali  kama Restless imeendelea kuimarisha ujenzi wa vituo vya kijamii vya malezi , makuzi na maendeleo ya awali ya Watoto, imeanzisha madawati  ya jinsia na Watoto katika vituo vya polisi ili wanajamii waweze kuripoti vitendo  vya ukatili vinavyofanyika katika jamii zao.

Kutokana na changamoto mbalimbali wanazokumbana nazo vijana na wanawake wengi kuhusiana na afya ya uzazi Pamoja na makuzi Shirika la Restless limetoa elimu hii ili kuzuia matatizo au madhara yanayosababishwa na kukosa elimu ya uzazi kama mimba za utotoni, magonjwa , utoaji mimba na hata kifo ,lengo la elimu hii ni kumlinda mtoto na kumuwezesha kusoma  kwa maendeleo mazuri ya baadaye na kwa manufaa taifa kwa ujumla.

Kwa kuwa Tunduma ni mji unaojishughulisha na biashara mbalimbali Shirika la Restless liliona kuna haja ya kutoa elimu kwa vijana juu ya stadi za Maisha na ujasiliamali ili kuwezesha kundi hili kunufaika na fursa mbalimbali zilizopo katika mji huu kuliko kusubiri nafasi za ajira zinazotolewa na serikali hivyo kuwataka vijana kujiajiri wenyewe kwa kuzingatia  matumizi sahihi ya fedha na kuunda vikundi mbalimbali ya ushirika ili kuwezeshana.

Sambamba na hilo wametoa elimu ya uraia na ushirikishwaji kwa vijana katika mipango mbalimbali ya kimaendeleo inayopangwa katika ngazi za familia na Serikali kwani kundi la vijana ndilo linalotegemewa kuliinua taifa lolote katika Nyanja mbalimbali za maendeleo.