SITOPOKEA MRADI ULIOJENGWA CHINI YA KIWANGO _ MHE. MLIMBA

Imewekwa : May 29th, 2023

Na William Maganga

Mwenyekiti wa Halmashauri ya Mji Tunduma Mhe. Ayubu Mlimba amesema yupo tayari kuukataa mradi wowote ambao umejengwa chini ya kiwango toka kwa mkandarasi yoyote

Mhe. Mlimba ameyasema hayo wakati akisaini mkataba wa ujenzi wa jengo la Upasuaji na Jengo la Wodi katika Hospitali ya Mji Tunduma unaogharimu Tsh. 500,000,000/=

Katika maelezo yake mwenyekiti huyo amemtaka mkandarasi kujenga kwa weledi na ufanisi mkubwa majengo hayo ili yaendane na thamani halisi inayotolewa na Serikali.

Aidha mwenyekiti huyo amesema kuwa mkandarasi kushindwa kumaliza kazi kwa wakati hiyo kwake hataki kuisikia kwani fedha zipo hivyo anategemea ujenzi huo utakamilika ndani ya siku 60 kama mkataba unavyosema

“Ukishindwa kumaliza kwa wakati hatutokuwa na muda wa nyongeza kwani wananchi wetu wanataka kupata huduma na wewe hapa leo umesema utamaliza ndani ya muda hivyo kafanye kazi usiku na mchana ili lengo litimie” alisisitiza Mhe. Mlimba

Mkurugenzi wa Halmashauri ya Mji Tunduma Philemon Magesa amewataka wakandarasi kuwa na ari ya kufanya kazi kwa weledi huku akisema suala ya kusaini mikataba kwa uwazi ni mbinu ya kuondoa vitendo vya rushwa vinavyoweza kujitokeza kwa baadhi ya watumishi na wakandarasi wasio waadilifu

“Si Mkurugenzi wala Mwenyekiti wa Halmashauri au kiongozi yeyote yule aje kuomba pesa au kwa ajili ya kujinufaisha, huyo ni mwizi kama wezi wengine ukishapata kazi basi sisi tunataka utukabidhi baada ya kumalika kama mkataba unavyotaka. Ikitokea changamoto ya kuombwa rushwa toa taarifa mapema” alisisitiza Mkurugenzi Magesa

Aidha Mkurugenzi Magesa amemtaka Mkandarasi kauanza kazi mara moja baada ya kusaini kwani kila kitu kinapatikana Tunduma. Hivyo atashangaa pindi mkandarasi atakapochelewa kutekeleza kwa kisingizio kununu vifaa nje ya Tunduma wakati vingi vinapatikana na vinaubora.