TAASISI ZA UMMA ZAPATA MGAO WA BIDHAA ZA MAGENDO MPAKA WA TUNDUMA

Imewekwa : February 9th, 2023

Na William Maganga,Tunduma

MKUU wa mkoa wa Songwe Wazir Kindamba ameongoza zoezi la ugawaji wa bidhaa zenye thamani ya Tsh. 12,433,920/= zilizokamatwa zikiingia nchini kwa njia za magendo kupitia mpaka wa Tunduma zikitokea nchi za jirani huku akiwapa changamoto maafisa wa Mamlaka ya mapato Tanzania (TRA) kuzidisha operesheni.

Mhe. Kindamba alisema katika operesheni iliyofanyika takribani siku kadhaa mamlaka ya mapato kwa kushirikiana na jeshi la Polisi wamefanikiwa kukamata bidhaa mbalimbali zilizokuwa zikivushwa kwa njia za panya kuingia nchini huku wahusika wakishindwa kuzilipia.

Alisema baada ya wenye mizigo hiyo kushindwa kuilipia, wamekutana na kuzigawa kwa makundi maalum iwemo taasisi za serikali na kusema mamlaka ya mapato (TRA) kwa kushirikiana na jeshi la polisi kuendelea kutoa elimu kwa wafanyabiashara wote kuhakikisha wanafuata utaratibu uliopo wa kuingiza bidhaa hizo nchini.

Kaimu Meneja wa mamlaka ya mapato Tanzania (TRA) mkoa wa Songwe, Valelian Thadei alisema katika operesheni za mara kwa mara zilizofanywa kwa kushirikiana na meneja wa forodha Tunduma Mohammed Shamte na jeshi la polisi walifanikiwa kukamata bidhaa hizo zenye thamani ya Tsh. 12,433,920/=

 Alisema bidhaa hizo ambazo ni Sukari kilo 3,420 thamani yake ni Tsh. 10,260.000, Biskuti katon 96 thamani yake ni Tsh. 1,453,920 na Juisi Apple katon 15 thamani yake ni Tsh.720,000 jumla yake ni Tsh.12,433,920.

Miongoni mwa Taasisi zilizopata mgao ni shule za sekondari za Tunduma, Songwe, Vwawa, Mlangali, Simbega, Tunduma Tc, Mwl. J. K. Nyerere, Mpemba, Kafule, Chikanamilo, Maweni, Kanga pamoja na shule ya Msingi ya Mchepuo wa Kiingereza ya Tunduma na shule ya msingi Mwenge.

Valelian aliongeza kuwa pia wamegawa katika kituo cha kulelea watoto yatima cha Mbozi Misheni, Jeshi la Magereza, kituo cha UMISETA na UMITASHUNTA ambapo tayari wahusika wamezipokea huku akimuhakikishia mkuu wa mkoa kuwa zoezi la operesheni litaendelea ili kuhakikisha hakuna mtu anayevusha magendo.

Afisa Elimu Sekondari wa Halmashauri ya Mji Tunduma Bi. Patricia Mbigili alisema anashukuru sana kwa mgao wa vifaa hivyo kwani vitasaidia katika matumizi ya wanafunzi wa shule za bweni na kupongeza sana busara za kuamua kuvigawa kwa taasisi za umma

Mpaka wa Tunduma unatumika na nchi wanachama za kusini mwa Afrika (SADC) na kumekuwepo na muingiliano mkubwa wa watu wanaofika kufanya biashara huku wengi wao wakiwa si waaminifu wakitumia njia za panya kuvusha bidhaa na kuikosesha serikali mapato, ipo haja mamlaka husika kuongeza kasi ya kuwadhibiti.