Tanduma Yanufaika na Msaada Uliotolewa na Benki ya NMB Mkoa wa Songwe

Imewekwa : November 3rd, 2023

Mkuu wa Mkoa Songwe, Mhe. Dkt. Francis Michael ameishukuru Benki ya NMB kwa kutoa msaada wenye thamani ya zaidi ya shilingi milioni 56 ikiwemo mabati 440 na madawati 491 ikiwa ni mchango wa Benki hiyo kuunga mkono jitihada za Serikali katika kuboresha sekta ya elimu nchini.

 Dkt. Michael ameyasema hayo wakati wa hafla fupi ya makabidhiano ya vifaa hivyo iliyofanyika Ofisi ya Mkuu wa Mkoa wa Songwe tarehe 03 Novemba 2023.

Mkuu wa Mkoa huyo amesema msaada huo utasaidia kuboresha mazingira ya Wanafunzi kujisomea huku akiwaahidi Wanafunzi wa Kidato cha Nne 2023 ambao wanatarajia kuanza mitihani tarehe 13 Novemba 2023 katika Mkoa wa Songwe kujitahidi kufanya vizuri na wote watakaopata Daraja la Kwanza atawachinjia ng’ombe na kula nao chakula cha mchana.

Dkt. Michael amepokea msaada huo na kusema utazinufaisha shule nane (8) za Halmashauri ya Mji Tunduma na Halmashauri ya Wilaya ya Mbozi ambapo ameishukuru Benki hiyo kwa kuendelea kuwa karibu na Wananchi kwani msaada huo ni kielelezo tosha.

“NMB kwa kweli usemi huu wa ‘NMB, Karibu Yako’ ni kweli mpo karibu ya watu, kwa sababu mimi ninapofanya kazi zangu za kutembea kwa Wananchi vijijini napita sehemu ambazo siwezi kuamini naikuta NMB ipo hongereni sana, lakini zaidi ya hayo ni kwa yale mnayoyafanya kwa sababu ya maendeleo ya Wananchi kwa ujumla.” Anasema Dkt. Michael na kuongeza;

“NBM sehemu zote ambazo zina shughuli za kitaifa na ninyi mpo, na hili suala la Cooperate Social Responsibility mnalifanya kwa kiwango kikubwa sana na nimefurahi kwa sababu shilingi milioni 56.36 siyo fedha ndogo na mmeweza kutoa kwa shule nane (8) hizi ni fedha nyingi...ili kusudi watoto wetu hawa wapate mazingira mazuri ya kusomea, kama mtoto hapati mazingira mazuri ya kusoma hawezi pia kupata elimu inavyopaswa.”

Pia, Dkt. Michael ameipongeza Benki hiyo kwa kusimamia utunzaji wa mazingira kwa kupanda miti zaidi ya milioni moja na kuisimamia matunzo yake.

“Hongereni sana NMB muendelee na moy huo sisi kama Serikali tupo pamoja na ninyi, kwa sababu sisi ndo wateja wenu…endeleeni kutoa huduma bora kwa Wananchi.” Amesema Dkt. Michael.

Kwa upande wake, Meneja wa NMB Kanda ya Nyanda za Juu Kusini, Straton Chilongola amesema Benki hiyo inathamini jitihada za Serikali katika kuleta maendeleo hivyo imekuwa na utaratibu wa kuchangia kama Mdau kwa kutambua jamii inayonufaika ndio Wateja wa Benki hiyo ambayo ina matawi katika Wilaya zote nchini huku akiushukuru uongozi wa Mkoa huo kwa ushirikiano wanaoutoa kwa Benki hiyo.

“Pamoja na makubwa yanayofanywa na Serikali, sisi kama wadau tunao wajibu mkubwa wa kuunga mkono juhudi hizi za maendeleo kwa kusaidia jamii zetu kwani jamii hizi ndiyo zimeifanya Benki ya NMB kuwa hapa ilipo na kubwa kuliko benki yoyote hapa nchini.” Amesema Chilongola.

Chilongola amesema kwa miaka kadhaa sasa, NMB imekuwa ikisaidia miradi mbalimbali ya maendeleo kwa kujikita zaidi kwenye miradi ya elimu (madawati na vifaa vya kuezeka), afya (vitanda, magodoro yake na vifaa vingine vya kusaidia matibabu) na kusaidia majanga mbalimbali nchini.

Amesema NMB inatambua kuwa ni kupitia jamii ndipo wateja wao wengi wanapotoka, kwa hiyo kurudisha sehemu ya faida kwa jamii ni utamaduni wao.

Chilongola ameongeza kuwa Benki ya NMB imekuwa mstari wa mbele kuchangia huduma za kijamii kwa lengo la kurejesha sehemu ya faida yake kwa jamii na ni kwa zaidi ya miaka saba mfululizo Benki hiyo imekuwa ikitenga asilimia moja (1) ya faida yake kama sehemu ya uwajibikaji kwa jamii inayowanzunguka.

Kiongozi huyo anayesimamia Benki ya NMB Nyanda za Juu inayojumuisha mikoa mitano ya Rukwa, Songwe, Mbeya, Njombe na Iringa, ndiyo benki inayoongoza nchini huku ikiwa na matawi 228, mashine za ATM zaidi ya 700 nchi nzima, NMB Wakala ni zaidi ya 17,000 pamoja na idadi ya wateja zaidi ya milioni 5 idadi ambayo ni hazina kubwa ukilinganisha na benki nyingine nchini.

Matukio Katika Picha: