TASAF IMETENDA MIUJIZA TUNDUMA

Imewekwa : June 7th, 2022

Mkazi wa Mtaa wa Chipaka kata ya Chipaka Bi. Anna Sichimata ameushangaza Umma wa Wanatunduma na Watanzania kwa ujumla baada ya kuonyesha mafanikio aliyoyapata tangu alipoanza kupokea Pesa ya Mfuko wa Maendeleo ya Jamii (TASAF) Julai mwaka 2015 hadi sasa 2022

Bi. Anna amesema kabla ya kuingia katika mpango wa TASAF maisha yake yalikuwa duni lakini baada ya mpango huo ameweza kujenga nyumba ya bati (SAUZI), analima mashamba na kununua Mbolea bila shida na kilimo chake kimekuwa kikikuwa mwaka hadi mwaka

"Wakati mkutano wa Mtaa umeitishwa ili kuwapata walengwa wa TASAF nilionekana mimi pia ni mmoja wapo wa walengwa ila niliona kama udhalilishaji kutokana na hali yangu ya umasikini, nashukuru mtendaji wa Mtaa kwa kunielewesha kuhusu mpango huu, hadi sasa mafanikio niliyo nayo yametokana na mpango wa TASAF", amesema Bi. Anna.

Bi. Anna ameeleza kuwa kabla ya TASAF alikuwa akiishi kwenye nyumba yenye makazi duni ambayo waliyo ijenga marehemu wazazi wake zamani sana. Lakini sasa ameweza kununua kiwanja na kujenga nyumba ya bati ambayo inamfanya kila siku amuombee Rais wa Jamhuri ya Muungano wa Tanzania Mhe. Samia Suluhu Hassan kwani Pesa hizi anazozitoa Rais zinawafikia walengwa moja kwa moja.

Mratibu wa TASAF wa Halmashauri ya Mji Tunduma Bwana Freza Mapunda wakati akiongea na wanufaika kabla ya zoezi la utoaji Pesa kuanza aliwaasa wanufaika kuwa lengo la mfuko wa TASAF ni kumsaidia mnufaika apige hatua haraka kutoka kwenye umasikini na aweze kuyamudu maisha ya kaya yake kwa kuwa na uhakika wa chakula, huduma za fya na elimu na hata kuchangia katika pato la Taifa kwa kuzalisha mali kupitia kilimo, ufugaji na biashara, nawashauri wanufaika wote mzitumie pesa hizi vizuri ili ziweze kuleta matokeo chanya katika kuinua kaya zenu

Katika dirisha hili la TASAF la Mwezi Mai Halmashauri ya Mji wa Tunduma umetoa jumla ya Tsh. 66,340,000/= kwa wanufaika 1677 wanaopatikana ndani ya Halmashauri ya Mji wa Tunduma.