TAWEN YAFUNGUA TAWI TUNDUMA WILAYANI MOMBA

Imewekwa : August 27th, 2022

 Taasisi ya kuwawezesha wanawake Kiuchumi, Kisiasa, Kielimu na Uongozi Tanzania Tanzania Women Empowerment Network (TAWEN) leo Agosti 27 imefungua tawi lake katika Mji wa Tunduma Wilayani Momba kuwaunganisha wanawake wote katika Mkoa wa Songwe ambapo Mhe. Mbonimpaye  Mpango alikuwa mgeni rasmi wa uzinduzi huo

Mwanzilishi wa TAWEN Bi. Florence Masunga amesema kuwa TAWEN ni Taasisi isiyo ya Kiserikali iliyoanzishwa mnamo tarehe 31 Novemba 2021 Jijini Dodoma inayofanya kazi chini ya Wizara ya Maendeleo ya jamii kwa lengo la kuwasaidia au kuwawezesha wanawake katika nyanja mbalimbali, ikiwemo kuboresha hali ya kiuchumi kwa kusaidia au  kuibua vipaji mbalimbali walivyonavyo wanawake Pamoja na kutekeleza shughuli za ujasiliamali.

Katika uzinduzi huo uliofanyika katika ukumbi wa Staples Inn uliopo Chapwa Tunduma Mgeni rasmi mke wa makamu wa Rais wa Jamhuri ya Muungano wa Tanzania Mhe. Mbonimpaye Mpango ambaye ndiye mshauri mkuu wa shirika hilo  amesema TAWEN inalenga kuwawezesha wanawake na mabinti Kibiashara, katika Uongozi, Elimu, Kisiasa na Kiuchumi.

“TAWEN inaunga mkono malengo ya Serikali ya Awamu ya Sita  inayoongozwa na Rais wa Jamhuri ya Muungano wa Tanzania Mhe. Samia Suluhu Hassan katika suala zima la kumkomboa mwanamke  kwa hatua zilizofikiwa za kumkomboa mwanamke duniani na kuhakikisha mwanamke anakuwa chachu ya maendeleo kwa ngazi ya familia na Taifa kwa ujumla” alisema Mhe. Mbonimpaye Mpango

Pia amewaasa wanasongwe hususani wanawake kuzitumia vizuri fursa zilizopo na kuwataka waweze kusikilizana na kujadiliana kwa makini ili waweze kutambua yale wasioyajua ili kufikia mwishoni mwa mwaka huu waweze kutatua changamoto mbalimbali zinazowakumba wanawake.

Katika kutekeleza majukumu ya TAWEN mwalimu wa viwanda Bi. Fatma Kange alifungua kiwanda cha alizeti kinachosimamiwa na wanawake ambacho kiliwekwa wakfu na Mgeni rasmi katika uzinduzi huo na  kuwasisitiza kwamba ili kiwanda hicho kikue na kudumu kinahitaji ushirikiano baina yao na ubora wa bidhaa zinazozalishwa

Aidha Mwenyekiti wa TAWEN ambaye pia ni mke wa Waziri mkuumstaafu Mhe. Tunu Pinda alisema uwepo wa TAWEN katika Mkoa wa Songwe utasaidia kuweka nguvu ya Pamoja ili kutumia fursa zilizopo kama kilimo cha kisasa, kuzalisha na kuchakata bidhaa kwa ubora zitakazokubalika kimataifa pia kuhamasishana wanawake wenyewe na kupeana fursa .

Sambamba na hilo aliwataka wanawake Mkoani Songwe kuwa  na ushirikiano katika kufanikisha malengo waliyonayo pamoja na utayari wa kufaniskiwa kama ilivyo kauli mbiu “Mwanamke inuka wakati ni sasa”