TUJENGE UTAMADUNI WA KUPIMA UKIMWI, BADO UPO TUSIJISAAU, RC KINDAMBA

Imewekwa : December 1st, 2022

SONGWE: Mkuu wa Mkoa wa Songwe, Mhe. Waziri Kindamba amewataka wananchi kuwa na utamaduni wa kupima Afya mara kwa mara ili kujua hali zao za maambukizi ya UKIMWI kwani bado ugonjwa upo na wasijikite kuchukua tahadhari dhidi ya UVIKO-19 au Ebola tu.

Amesema hayo wakati wa maadhimisho ya siku ya UKIMWI Duniani 1, Disemba ambayo kimkoa yamefanyika Tunduma katika viwanja vya Shule ya msingi Tunduma.

Mhe. Waziri Kindamba amesema kutokana na Dunia kupata magonjwa hatarii kama UVIKO-19 na Ebola watu wameanza kujisaau kuhusu UKIMWI, nataka niwaambie ugonjwa bado upo na tuchukue tahadhari zote za kujikinga.

Pia amewaasa vijana kuacha tabia ya kuwa na wapenzi wengi na kujiona fahari kwani kwa kufanya hivyo ni kujiweka hatarini zaidi kupata maambukizi ya UKIMWI.

Katibu Tawala wa Mkoa wa Songwe, Bi. Happiness Seneda amesema yako malengo matatu ya kidunia ambayo kama mkoa tunaendelea kuyatekeleza lengo la Kwanza ni 95% ya wananchi wawe wanajua hali zao, lengo la pili ni 95% ya wagonjwa wawe wanatumia dawa lengo la tatu ni 95% ya wagongwa wanaotumia dawa wawe na virusi vichache mwilini.

Aidha, Katibu Tawala, Bi. Happiness Seneda amesema hadi kufikia sasa hatufanyi vizuri katika watu kujua hali zao kwani tumefikia 94% kati ya 95% inayohitajika, lengo la pili tuna 98% na lengo la tatu 95%, nawapongeza wadau wote ambao wako kwenye vita ya mapambano ya UKIMWI.