TUNDUMA KINARA HOJA ZA CAG MKOA WA SONGWE YAPATA HATI INAYORIDHISHA MIAKA SITA MFULULIZO

Imewekwa : June 24th, 2022

Mdhibiti na Mkaguzi wa Hesabu za serikali Bi. Chausiku Mluge ameyasema hayo wakati akitoa taarifa katika kikao cha baraza la madiwani la Halmashauri ya Mji Tunduma la kujadili Hoja za CAG za mwaka wa fedha 2020/2021

Bi. Mluge alieleza kuwa, Hati ya ukaguzi ni maoni ya mkaguzi yanayoeleza kama taarifa za fedha zilizokaguliwa zimetayarishwa kwa kuzingatia viwango vya taaluma ya uhasibu na mambo yote muhimu, kwa mujibu wa misingi inayotumika katika uandaaji wa taarifa hizo. Hati ya ukaguzi pia inazungumzia kama taarifa za fedha zilizowasilishwa zina maelezo ya kutosha katika kuelezea vizuri na kwa upana zaidi taarifa hizo ili ziweze kueleweka kwa watumiaji.

Kuna aina Nne za hati ambazo ni Hati inayoridhisha, Hati yenye Shaka, Hati mbaya na kushindwa kutoa maoni.

Katika Mwaka wa Fedha 2020/21 Halmashauri ya Mji Tunduma ilipata Hati inayoridhisha (Unqualified Opinion). Hii ikiwa ni kwa Mwaka wa 6 mfululizo kuanzia mwaka wa fedha 2015/2016 hadi 2020/2021. Hati ya aina hii inatolewa wakati

Mdhibiti na Mkaguzi Mkuu wa Hesabu za Serikali amejiridhisha kuwa, kutokana na ushahidi uliokusanywa wakati wa ukaguzi, Halmashauri imeandaa taarifa za fedha kwa usahihi na kwa kuzingatia vigezo vyote vinavyotumika vya uandaaji wa taarifa za fedha, yaani Viwango vya Kimataifa vya Uandaaji wa Taarifa za Fedha katika Sekta ya Umma pamoja na miongozo mingine.

Aidha, katika ukaguzi wa shughuli za Mradi wa Mfuko wa Afya wa Pamoja (HSBF) Pamoja na shughuli za manunuzi Mdhibiti na Mkaguzi Mkuu wa Hesabu za Serikali aliweza kutoa hati ya ukaguzi inayoridhisha.

Katika Taarifa ya CAG ametoa aya yenye masuala ya mkazo ili kutoa angalizo kwa watumiaji wa taarifa za fedha, masuala hayo aliyachukuliwa kuwa muhimu sana kwa watumiaji wa taarifa hizo kuyafahamu ili waweze kuzielewa vizuri zaidi taarifa za fedha zilizokaguliwa.

Katika mwaka wa fedha 2020/2021 Mdhibiti na Mkaguzi Mkuu wa hesabu za Serikali alitoa jumla ya mapendekezo 33,

Menejimenti ya Halmashauri ya Mji Tunduma ilipokea mapendekezo hayo ya Ukaguzi na kuyafanyia kazi kikamilifu na mnamo tarehe 09.05.2022 Halmashauri iliwasilisha utekelezaji wa mapendekezo ya Mkaguzi katika Ofisi ya Taifa ya Ukaguzi.

Baada ya uhakiki kati ya mapendekezo 33 yaliyotolewa na Mdhibiti na Mkaguzi Mkuu wa hesabu za Serikali Jumla ya mapendekezo 16 sawa na asilimia 48.4 yametekelezwa kikamilifu na kufungwa na mapendekezo 17 sawa na asilimia 51.6 yako katika hatua mbalimbali za utekelezaji (Under Implementation) ambapo Mkaguzi atayapitia wakati wa ukaguzi wa mwaka wa fedha 2021/22 kwa ajili ya kujiridhisha kama uzingatiaji wa sheria, kanuni na taratibu umeboreshwa.

Aidha, kwa upande wa ukaguzi wa Mfuko wa afya wa pamoja (HSBF) kwa mwaka wa fedha 2020/2021 Mdhibiti na Mkaguzi Mkuu wa hesabu za Serikali alitoa Jumla ya mapendekezo 6 kati ya mapendekezo hayo mapendekezo 3 yamefanyiwa kazi kikamilifu na kufungwa, Pendekezo 1 bado halina utekelezaji na Mapendekezo 2 yako katika hatua mbalimbali za utekelezaji (Under Implementation) ambapo Mkaguzi atayapitia wakati wa ukaguzi wa mwaka wa fedha 2021/22 kwa ajili ya kujiridhisha kama kuna uzingatiaji wa sheria, kanuni na taratibu ili mapendekezo hayo yaweze kufungwa.

Menejimenti ya Halmashauri inaendelea kupitia na kuimarisha mifumo ya udhibiti wa ndani kwa kuhakikisha kuwa mifumo iliyopo inafanya kazi vizuri katika kupunguza au kuondoa dosari ambazo zinaweza kusababisha hoja za kiukaguzi. Aidha, Mafunzo ya mara kwa mara yanaendelea kutolewa kwa ajili ya kuwajengea uwezo watumishi katika masuala ya uzingatiaji wa sheria, kanuni na taratibu.

Mwisho, Mdhibiti na mkaguzi wa hesabu za Serikali alimpongeza mwenyekiti wa Halmashauri, wajumbe wote wa Baraza la Madiwani kwa kazi nzuri iliyowezesha Halmashauri kupata hati inayoridhisha (Unqualified opinion). Hii ni kiashiria kuwa Kamati ya fedha inatimiza majukumu yake kikamilifu kwa kutoa mwongozo wa mchakato wa kuandaa taarifa za fedha, mchakato wa ukaguzi, Kufanya mapitio ya mfumo wa udhibiti wa ndani wa Halmashauri na utii wa sheria, kanuni na taratibu.