TUNDUMA YAJIPANGA KUWA NA ZIRO MALARIA IFIKAPO 2030

Imewekwa : April 25th, 2023

Na William Maganga - Tunduma TC

Katika kupambana na Ugonjwa hatari wa Malaria unaoendelea kuangamiza watu nchini Tanzania na Bara la Afrika, Halmashauri ya Mji Tunduma Imejipanga kuhakikisha inatokomeza kabisa ugonjwa huo ifikapo mwaka 2030

Mganga mkuu wa Mji wa Tunduma Dkt. Enock Mwambalaswa ametoa kauli hiyo mapema leo alipokuwa akitoa elimu kwa wananchi na wagonjwa waliokuja kupata huduma katika Hospitali ya Mji Tunduma iliyopo Kata ya Mpemba

Katika maelezo yake Dkt. Mwambalaswa amesema kuwa Halmashauri ya Mji Tunduma imejipanga katika kukabiliana na ugonjwa wa Malaria kwa kuendelea kutoa elimu na kufuatilia mwenendo wa wagonjwa wanapokuja kutibiwa ili kujua kama elimu wanayoitoa inawasaidia wahusika

“Halmashauri ya Mji Tunduma katika kupambana dhini ya Malaria inao mkakati wa kuwapima Wagonjwa/ Wateja wote wafikapo katika vituo vya kutolea huduma wenye kuonesha dalili za malaria, mpaka sasa Halmashauri iko <4% ambapo tunao  mkakati wa kutokomeza ugonjwa wa Malaria na kuwa 0% ifikapo 2030” alisisistiza Dkt. Mwambalaswa

Aidha mratibu wa Malaria wa Halmashauri ya Mji Tunduma Bi. Grace Malugu amesema kuwa Halmashauri imefikia mafanikio haya kutokana na jitihada na mikakati iliyojiwekea katika kuutokomeza ugonjwa huu hatari wa Malaria

Bi. Malugu ameeleza kuwa Katika kutekeleza Mapambano dhidi ya Malaria serikali kupitia Wizara ya Afya kitengo cha Malaria mwaka wa fedha 2022/2023 imeendesha zoezi la ugawaji wa vyandarua kwa watoto wa shule za msingi kuanzia darasa la kwanza hadi la saba ambapo jumla ya shule za msingi 63 zenye jumla ya Wanafunzi 46,488 wamepatiwa vyandarua kwa shule za serikali na Binafsi

“Kwa mwezi Januari hadi Machi 2023 Jumla ya Wajawazito 4985 walifika kliniki na kupata huduma, kati yao 4355 walipimwa vimelea vya ugonjwa wa Malaria na 31 waligundulika kuwa na vimelea vya malaria, kati yao 4518 sawa na 90.6% ya Wajawazito wote waligawiwa vyandarua” alisema Bi. Malugu

Halmashshuri ya Mji Tunduma inaendelea kutoa elimu ya njia za kudhibiti ugonjwa wa malaria kama vile, Usafishaji wa mazingira kwa maeneo tofauti tofauti kama vile masoko, vituo vya Afya, mahotel, vyumba vya kulala wageni, Matumizi sahihi ya Vyandarua, Upuliziwaji wa viuatilifu kwa sehemu zenye maji yaliyo tuama na Kupima kabla ya kutumia dawa.