TUNDUMA YAMPONGEZA RAIS SAMIA SULUHU HASSAN UZINDUZI WA KWANZA WA MATOKEO YA SENSA 2022

Imewekwa : October 31st, 2022

Mkurugenzi wa Halmashauri ya Mji Tunduma Ndugu Philemon Mwita Magesa anapenda kumpongeza Rais wa Jamhuri ya Muungano wa Tanzania Mhe. Samia Suluhu Hassan kwa uzinduzi wa kwanza wa Sensa ya watu na makazi uliofanyika mapema leo tarehe 31 Oktoba 2022 katika uwanja wa Jamhuri Jijini Dodoma

Hakika matokeo ya Sensa ya Watu na makazi ya mwaka 2022 ni chachu katika kuleta maendeleo kwa wananchi

Matokeo haya ya sensa yatairahisishia Serikali katika kupanga bajeti kulingana na mahitaji halisi ya wananchi

Umuhimu wa kipekee wa Sensa ya Watu na Makazi ya Mwaka 2022 ni pamoja na:-

1. Kuisadia Serikali kupata taarifa za msingi zitakazosaidia mchakato wa utekelezaji wa Dira ya Maendeleo ya mwaka 2025, mageuzi ya masuala ya afya na jamii, pamoja na ufuatiliaji wa ajenda za maendeleo za kimataifa;

2. Taarifa za idadi ya watu husaidia katika mamlaka za wilaya katika utekelezaji wa mipango ya maendeleo ambayo huakisi matakwa ya watu katika ngazi husika na kusaidia kwenye uwiano wa mgawanyo wa rasilimali;

3. Taarifa za msingi za hali ya kidemografia, kijamii na kiuchumi za idadi ya watu na makazi za mipango katika ngazi zote;

4. Kigawio katika kukokotoa viashiria vingine mfano Pato la mtu mmoja mmoja, Pato la Taifa, Ajira na ukosefu wa Ajira na kiwango cha uandikishaji wa wanafunzi;

5. Taarifa itakayowezesha serikali kujua ongezeko la idadi ya watu, kwa mgawanyo na viashiria vingine, ambavyo ni muhimu kwa usimamizi wa mazingira; na

6. Msingi wa utawala bora na ujumuishaji wa demokrasia. Takwimu sahihi za Sensa zinahitajika kwa ajili ya ugawaji wa majimbo ya uchaguzi kwa ufanisi, kurekebisha mipaka ya kiutawala katika serikali za mitaa.