TUNDUMA YAPOKEA MILIONI MIA NNE TOKA SERIKALI KUU UJENZI WA HOSTELI NA MGAHAWA

Imewekwa : April 4th, 2022

Pongezi kwa Rais wa Jamhuri ya Muungano wa Tanzania Mhe. Samia Suluhu Hassan kwa kuleta fedha kwa ujenzi wa awamu ya pili ya Mradi wa Maegesho Tsh. 400,000,000/= za kujenga jengo la nyumba ya kulala wageni (Hostel) na jengo la sehemu ya chakula (Restaurant) ambapo nyumba ya kulala wageni itakuwa na vyumba 20 na mgahawa utakuwa na uwezo wa kuhudumia wateja 36 kwa mara moja na baa itakuwa na uwezo wa kuhudumia wateje 28 kwa wakati mmoja.

Katika kipindi cha mwaka wa Fedha 2018/2019, Halmashauri ya Mji Tunduma ili idhinishiwa kutumia fedha kwa ajili ya miradi miwili ya Kimkakati yaani Maegesho ya Magari Makubwa yanayovuka mpaka wa Tanzania–Zambia na Ujenzi wa Stendi ya Mabasi. Mradi wa ujenzi wa maegesho ya magari yanayovuka mpaka wa Tanzania na Zambia upo katika Kata ya Chapwa, mtaa wa Msapania.

Mradi huu ulianzishwa kwa lengo la kuongeza mapato ya Halmashauri ikiwa ni utekelezaji wa malengo ya Serikali ya kuhakikisha kila Halmashauri inaongeza uwezo wa kujitegemea ili kupunguza utegemezi wa fedha toka serikali kuu.

Eneo la ujenzi wa Maegesho lina jumla ya ukubwa wa ekari 17 ambazo Halmashuri ilitwaa kutoka kwa wananchi kwa kuwalipa fidia ili kufanikisha Ujenzi wa Mradi huu pamoja na ujenzi wa ofisi nyingine za taasisi.

Lengo la Mradi huu ni kuiongezea Halmashauri mapato yake ya ndani ili kupunguza utegemezi kutoka Serikali kuu na hatimaye kujitegemea kabisa katika uendeshaji wa shughuli zake. Pia kupunguza msongamano wa malori yanayoegeshwa bila utaratibu kandokando ya barabara.

Halmashauri ya Mji Tunduma ilitengewa fedha jumla ya Shilingi 1,630,000,000.00 kutoka serikali kuu kwa mwaka wa fedha 2018/2019 kwa ajili ya ujenzi wa Maegesho ya Magari Makubwa yanayovuka Mpaka wa Tanzania-Zambia kama mradi wa Kimkakati. Pia katika mapato yake ya ndani ilitenga Shilingi 119,000,000/= kwa ajili ya kulipa fidia ya kutwaa eneo la kujenga mradi huu kutoka kwa wananchi. Hata hivyo mpaka kufikia mwezi Februari 2022 jumla Fedha iliyopokelewa kwa ajili mradi huu ni Tshs 1,936,079,294.00. ambapo ni fedha toka serikali kuu Pamoja na mapato ya ndani.

Tangu kuanza kwa mradi jumla ya Shilingi 1,842,079,294 zimepokelewa toka serikali kuu na Tshs 94,000,000 zimetumika kwenye mradi huu toka mapato ya ndani ya Halmashauri, Hivyo Jumla kuu ni Tshs 1,936,079,294.

Kiasi cha Tshs. 400,000,000 zilizopokelewa kwa mwaka wa fedha 2021/2022 zinaendelea kutumika kwa kujenga nyumba ya kulala wageni (Rest house) pamoja na jengo la mgahawa (Restaurant)

Manufaa ya mradi wa Ujenzi wa Maegesho ya Magari Makubwa yanayovuka Mpaka wa Tanzania–Zambia (Truck’s Parking) ukikamilika unatarajiwa kuiongezea Halmashauri mapato ya ndani na kuongeza ajira kwa vijana hususani katika sekta ya Usafi na Mazingira.

Mpaka sasa mradi umekamilika kwa asilimia 95 ambapo tayari umeanza kufanya kazi, wastani wa magari 100 yanaegeshwa kila siku.

Mradi huu kwa sehemu iliyokamilika toka imeanza kutumika mwaka 2020/2021 hadi kufikia mwezi Februari 2022 tayari umeingiza kiasi cha shilingi  77,485,300.00. Mapato haya yataongezeka zaidi baada ya kukamilisha awamu hii ya ujenzi wa Nyumba ya kulala wageni na mgahawa.

Mwaka 2021/2022 Halmashahuri ilipokea kiasi cha Tshs 400,000,000 kwa ajili ya kuendeleza mradi huu awamu ya pili, ambapo kwa awamu hii kazi inayofanyika ni kujenga jengo la nyumba ya kulala wageni (Hostel) na jengo la sehemu ya chakula (Restaurant) ambapo nyumba ya kulala wageni itakuwa na vyumba 20 na mgahwa utakuwa na uwezo wa kuhudumia wateja 36 kwa mara moja na baa itakuwa na uwezo wa kuhudumia wateje 28 kwa wakati mmoja.

Katika ukamilishwaji wa awamu ya pili ya ujenzi, Halmashauri imejipanga kuhakikisha inakamilisha kwa wakati mradi huu, ambapo kwa mujibu wa mkataba kazi hii itafanyika kwa siku 90, kuanzia tarehe 12/02/2022 na kukamilika tarehe 17/05/2022, Kukamilika kwa majengo haya mawili kutawapunguzia adha wateja kwenda mbali kutafuta huduma ya chakula na mahala pa kulala, lakini pia itaongeza mapato ya ndani ya halmashauri ambapo inakadiliwa kupata jumla ya shilingi 75,400,000 kwa mwaka ikiwa hosteli ni shilingi 73,000,000 na restaurant ni 2,400,000