TUTOKE ENZI ZA KUUZA NG'OMBE KWA KESI YA KUKU_RC KINDAMBA

Imewekwa : February 2nd, 2023

Mkuu wa Mkoa wa Songwe, Waziri Kindamba amewataka wananchi wa mkoa huo kutumia elimu waliyoipata wakati wa maadhimisho ya wiki ya Sheria iwasaidie kupata suluhu ya migogoro katika jamii huku akiwaasa kutoka zama za kuuza ng'ombe kwa kesi ya kuku.

RC Kindamba ametoa rai hiyo leo Jumatano Februari mosi, 2023 wakati wa maadhimisho ya kilele cha wiki ya Sheria ambayo kimkoa yamefanyika katika viwanja vya Mahakama ya Hakimu Mkazi Mkoa wa Songwe iliopo Nselewa.

Amesema kuwa kupitia maadhimisho hayo wadau wa mahakama watawaongoza wadaawa ambao ni mshtaki na mshtakiwa katika kutatua mgogoro wao kwa njia ya usuluhishi.

"Ni matumaini yangu watu wa mahakama na wananchi wa Mkoa wa Songwe wameyatendea haki maadhimisho ya wiki ya Sheria mpaka kufikia leo kilelele cha maadhimisho hayo kwa kujitokeza kupata elimu na kufahamu hatua mbalimbali za kufungua majalada mahakamani" amesema mkuu huyo wa mkoa.

Katika maadhimisho hayo yenye kaulimbiu umuhimu wa kutatua migogoro kwa njia ya usuluhishi katika kukuza uchumi endelevu: wajibu wa mahakama, RC Kindamba ametoa wito kwa jamii kutafuta njia bora za utatuzi wa migogoro na si kuendeleza zilizopitwa na wakati.

"Tutoke katika enzi za kuuza ng'ombe kwa kesi ya kuku, lazima tutafute suluhu ya migogoro yetu" amesesitiza mkuu huyo wa mkoa

Ameeleza kuwa Rais Samia anatamani watanzania wote wapate haki na kuwataka waliopewa dhamana ya kuwasimamia wananchi watende haki.

Akisoma hotuba kwa mgeni rasmi Hakimu Mkazi Mkuu Mfawidhi, Hassan Makube amesema mahakama ina jukumu la kuhakikisha kuwa suala la utoaji haki linafanyika kwa wakati.

Makube amezitaja changamoto za kutatua migogoro kwa njia ya usuluhishi kuwa ni uelewa mdogo wa njia hiyo, kutokuwa tayari kujishihusha na gharama ya kuwalipa wasuluhishi nje ya mahakama.

Kwa upande wake Mkuu wa Wilaya ya Momba, Fakii Lulandala ambaye amekaimu nafasi ya Mkuu wa Wilaya ya Mbozi, Esther Mahawe amesema kuwa katika moja ya jukumu la ofisi ya mkuu wa wilaya ni usuluhishi wa migogoro hivyo ofisi hiyo inapunguza kesi mahakamani.