TUUSHEREHEKEE UHURU WA TANZANIA BARA KWA KILIMO CHENYE TIJA _ DAS MOMBA

Imewekwa : December 9th, 2022

Katibu tawala Wilaya ya Momba Bi. Mary Marco ameyasema hayo katika Sherehe za Uhuru wa Tanzania Bara zilizo fanyika kiwilaya katika Ukumbi wa Shule ya Sekondari Tunduma TC iliyopo kata ya Maporomoko ndani ya Halmashamauri ya Mji Tunduma

Katika Maelezo yake Katibu tawala amewaeleza wananchi waliohudhuria maadhimisho hayo kuwa

“Kipindi cha miaka 61 (1961 – 2022) katika Sekta ya kilimo Wilaya ya Momba imepata mafanikio mengi ikiwemo uzalishaji wa mazao ya chakula ya kujitosheleza, na ongezeko la mazao ya biashara kama Alizeti, Ufuta, Uwele, Mtama Na Mpunga. Mabadiliko makubwa katika matumizi ya teknolojia za kisasa katika kilimo (zana za           Kilimo, Pembejeo, Mbolea, Mbegu bora na   hifadhi bora ya mazao kupitia maghala yaliyojengwa). Uzalishaji wa mazao ya chakula umeongezeka kufikia tani 187,808.05 mwaka 2021/2022 ambayo ni mazao Ya Mahindi, Mpunga, Mtama, Uwele, Muhogo, Viazi Vitamu, na Maharage” alisema Katibu Tawala

Uzalishaji wa mazao ya biashara ambayo ni Alizeti, Ufuta, Ulezi na Uwele umeongezeka na kufikia tani 29,307 mwaka 2021/2022. 

Pia Katibu tawala aliendela kueleza kuwa kwa miaka 61 sasa matumizi ya zana za kilimo yameboreshwa.

“Mwaka 1961 hadi mwaka 1975 matumizi ya zana bora yalikuwa duni na hivyo kazi nyingi za kilimo zilifanyika kwa kutumia jembe la mkono na wanyamakazi kwa kiasi kidogo.  Mwaka 2012/2013 Wilaya ilikuwa na jumla ya matrekta makubwa 1, matrekta madogo 2 na majembe ya kukokotwa na wanyamakazi 414 Mwaka 2021/2022, zana hizi zimeongezeka hadi kufikia matrekta makubwa 8, matrekta madogo 24” alisisitiza Katibu Tawala

Eneo linalolimwa kwa lengo la uzalishaji wa mazao ya chakula na biashara limekuwa likiongezeka mwaka hadi mwaka. Takwimu za hivi karibuni zimeonyesha kuwa eneo linalolimwa limeongezeka kufikia hekta 129,137 Mwaka 2021/2022. Matumizi ya mbolea ya viwandani kutoka tani 293 mwaka 2013 hadi kufikia wastani wa tani 13,913.6 kwa mwaka 2021/2022.

Aidha katibu tawala alisisistiza umuhimu wa wananachi kutumia kikamilifu fursa nyingi zilizopo za uwekezaji ambazo tukizitumia vizuri tutaweza kuondoa umaskini wa kipato na kuboresha hali ya maisha ya wananchi wa Wilaya ya Momba, Kiuchumi na Kijamii.  Kwa miaka sitini ijayo tuongeze nguvu katika kufanya kazi kwa bidii, kutumia kikamilifu rasilimali tulizo nazo kwa kuzalisha zaidi bidhaa zilizoongezwa thamani na kutumia fursa za masoko zilizopo ikiwa ni pamoja na matumizi mazuri ya rasilimaliwatu, ardhi na teknolojia ya kisasa kwa manufaa ya Mkoa na Taifa kwa ujumla

Mwisho: Katibu tawala aliwashukuru wana umoja wa Mbeya Kwanza Project kwa kujitoa kwao katika kuadhimisha Sherehe za uhuru wa Tanzania Bara kwa kuwanunulia mahitaji mbalimbali Watoto wenye uhutaji maalumu. Katika maadhimisho hayo umoja wa Asante Mbeya Project ulitoa vitu vyenye thamani ya Tsh. 2,005,500/= ikiwemo Magodoro, Mchele, Unga Wa Semge, Madaftari, Chumvi, Sukari, Sabuni na Taulo za Kike.