Uzinduzi Basi la Mnufaika Mikopo ya Asilimia 10 Wafanyika; Kuanza Safari Zake Tunduma - Mbeya

Imewekwa : May 17th, 2025

Pichani ni Mwenyekiti wa Chama cha Mapinduzi Wilaya ya Momba, Silvester Lwila na Viongozi mbalimbali kwa pamoja wakikata utepe kuashiria uzinduzi wa kuanza safari zake, Basi Dogo la Abiria aina ya Toyota Coaster lenye Namba za Isajili T 267 ELS ambalo limenunuliwa na Mnufaika wa Mikopo ya Asilimia Kumi (10%) inayotokana na mapato ya ndani ya Halmashauri ya Mji Tunduma, Brown Andengele wakati wa ziara ya kawaida ya Kamati ya Siasa ya Chama hicho Wilaya ya Momba kwa Halmashauri hiyo tarehe 17 Mei 2025.

Brown ambaye ni mlemavu, mwezi Novemba 2024 amekopeshwa na Halmashauri hiyo shilingi milioni 121.3 kwa ajili ya mradi huo ambapo katika kipindi hicho Halmashauri hiyo ilitoa mikopo ya shilingi bilioni 4.6 zinazotokana na Asilimia Kumi (10%) ya mapato ya ndani ya Halmashauri kwa Vikundi vya Wanawake, Vijana na Watu Wenye Ulemavu.

Wa kwanza aliyevaa miwani ni Mkurugenzi wa Halmashauri ya Mji Tunduma, Mariam Chaurembo ambaye Kamati hiyo imempongeza kwa kusimamia female ukusanyaji wa mapato ya Halmashauri pamoja na usimamizi mzuri wa utoaji wa mikopo hiyo kwa wahusika.

Matukio katika Picha:

Matukio Mengine katika Picha wakati wa Ziara ya Kamati ya Siasa ya Chama cha Mapinduzi (CCM) Wilaya ya Momba kwa Halmashauri ya Mji Tunduma tarehe 17 Mei 2025:

Wajumbe wa Kamati ya Siasa ya CCM Wilaya ya Momba wakikagua maendeleo ya ujenzi wa moja ya madaraja sita yanayojengwa kupitia Mradi wa Kufungua Barabara ya Mpande - Machinjioni yenye urefu wa kilomita 8. Mradi huo ambao kwa mujibu wa mkataba unatekelezwa kwa muda miezi sita (kuanzia tarehe 25 Desemba 2024 hadi tarehe 25 Juni 2025) na Mkandarasi Mante Construction Company Limited kwa gharama ya shilingi milioni 425.6 za mapato ya ndani ya Halmashauri ya Mji Tunduma kwa mwaka wa fedha 2024/2025. Aidha, ufunguzi wa Barabara hiyo na ujenzi wa madaraja hayo sita unasimamiwa na Wakala wa Barabara za Vijijini na Mijini - TARURA Wilaya ya Momba.

Mkurugenzi wa Halmashauri ya Mji Tunduma, Mariam Chaurembo akitoa taarifa ya utekelezaji wa Mradi wa Kufungua Barabara ya Mpande - Machinjioni yenye urefu wa kilomita 8, kwa Kamati ya Siasa ya Chama cha Mapinduzi Wilaya ya Momba ikiongozwa na Mwenyekiti wake, Silvester Lwila tarehe 17 Mei 2025.

Wajumbe wa Kamati ya Siasa ya CCM Wilaya ya Momba wakikagua maendeleo ya ujenzi wa mabweni mawlili (Wavulana bweni moja na Wasichana bweni moja) katika Shule ya Sekondari Mpande ambapo bweni moja lina uwezo wa kuchukua wanafunzi 80 hivyo, yatawanufaisha Wanafunzi 160. Mradi huo kwa mujibu wa mkataba unatekelezwa kwa muda wa miezi mitatu na Mkandarasi Ubengwa Bulders ya jijini Dar es Salaam kwa gharama ya shilingi milioni 258.7 za mapato ya ndani ya Halmashauri ya Mji Tunduma kwa mwaka wa fedha 2024/2025.

Wajumbe wa Kamati ya Siasa ya Chama cha Mapinduzi Wilaya ya Momba wakikagua ujenzi wa Zahanati mpya ya Nyerere tarehe 17 Mei 2025, ambayo tayari ujenzi wake umeshakamilika na imeanza kutoa huduma kwa Wananchi. Mradi huo mpaka kukamilika wake umegharimu shilingi milioni 64.5 ambapo Serikali ilileta shilingi milioni 50, Nguvu za Wananchi shilingi milioni 8.5, Mfuko wa Jimbo shilingi milioni 3 na Halmashauri ya Mji Tunduma kupitia mapato yake ya ndani shilingi milioni 3.

Kamati ya Siasa ya Chama cha Mapinduzi Wilaya ya Momba ikikagua maendeleo ya Mradi wa Ujenzi wa Barabara ya Sogea - Transfoma yenye urefu wa kilometa 2 kwa kiwango cha lami, wakati wa ziara ya kawaida ya Kamati hiyo tarehe 17 Mei 2025. Baraba hiyo ambayo ujenzi wake unasimamiwa na Wakala wa Barabara za Vijijini na Mijini - TARURA Wilaya ya Momba unagharimu shilingi bilioni 1.8 mpaka kukamilisha ujenzi wa Barabara hiyo.

Kamati ya Siasa ya Chama cha Mapinduzi Wilaya ya Momba ikikagua ujenzi wa vyumba vya madarasa 11 katika Shule ya Msingi Makambini iliyopo Kata ya Makambini. Ujenzi wa madarasa hayo unagharamu shilingi milioni 275 ambapo shilingi milioni 75 (za ujenzi wa madarasa matatu) zimetolewa na Serikali Kuu kupitia mradi wa BOOST, milioni 150 (za ujenzi wa madarasa sita) zinazotokana na Mapato ya Ndani ya Halmashauri hiyo kwa mwaka wa fedha 2024/2025 na shilingi milioni 50 za kujenga madarasa mawili zimeletwa na Serikali Kuu kupitia Mradi wa Kuimarisha Stadi za Kusoma, Kuandika na Kuhesabu - Lanes Awamu ya Pili, ambapo ujenzi huo unafanyika kupitia njia ya "Force Account".