UZINDUZI WA KAMPENI YA KUTOA CHANJO YA MATONE YA POLIO

Imewekwa : September 1st, 2022

Kaimu Mkuu wa Mkoa wa Songwe ambaye pia ni Mkuu wa Wilaya ya Momba Mhe. Fakii Lulandala amefungua kampoeni ya kutoa chanjo ya matone ya polio katika Kituo cha Afya Tunduma ambapo kimkoa uzinduzi huo umefanyika katika Halmashauri ya Mji Tunduma

Akiongea wakati uzinduzi huo Mhe. Fakii alisema kuwa anaishukuru sana Serikali ya Awamu ya Sita kupitia Wizara ya Afya na OR – TAMISEMI kwa kushirikiana na wadau kwa kazi ambayo imekuwa ikifanyika kwa kipindi chote cha mapambano ya kukabiliana na tishio la uwepo wa Ugonjwa wa Polio uliotangazwa na kuthibitishwa na Shirika la Afya Duniani (WHO) Nchini Malawi na kufuatiwa na Nchi ya Msumbiji

Aidha Mhe. Fakii aliendelea kusema “Kampeni hii itafanyika kwa siku nne kuanzia leo tarehe 01 – 04 Septemba 2022 na itafanyika nyumba kwa nyumba, vituo vya huduma za Afya na kuwafuata watoto mahali popote walipo. Chanjo hii ni salama na hutolewa bila malipo na wataalamu wetu wenye ujuzi. Natoa rai kwa wananchi wote kuepuka taarifa zozote za upotoshaji kuhusiana na huduma zote za chanjo hususani Chanjo ya Polio”

Mwisho Mhe. Fakii alisema kuwa ili tufikie malengo tuliyojiwekea naomba kuwahimiza wananchi wote kujitokeza kushiriki katika kampeni hii kwa kila mzazi au mlezi kuhakikisha walengwa wanapata chanjo katika siku ambayo watoa huduma za chanjo wanapita, lakini pia kuhakikisha kila mmoja anamtaarifu Jirani, ndugu, jamaa au rafiki yeyote unayemfahamu na mlengwa ili aweze kujua siku ambayo wahudumu watapita kutoa chanjo

KUMBUKA: Mtoto asiyepata chanjo ni hatari kwa maisha yake na kwa jamii inayomzunguka. Hivyo ni jukumu la kila mmoja wetu kuhakikisha anakuwa mlinzi wa mwenzake.