WAANDISHI WA HABARI CHUKUENI TAARIFA KUTOKA KWENYE VYANZO SAHIHI_ Msigwa

Imewekwa : November 8th, 2022

Hayo ameyasema Mkurugenzi wa Idara ya Habari na  Msemaji Mkuu wa Serikali Ndugu Gerson P. Msigwa wakati akizungumza na waandishi wa Habari mjini Bukoba. Mkurugenzi Msigwa amesema kuwa anawapongeza sana waandishi wa Habari kwa kazi nzuri wanayoendelea kuifanya.

“Waziri Mkuu Mhe. Kassim Mjaliwa amenituma niwaambie kwamba ameona kazi kubwa ya kuhabarisha umma mnayoifanya na anaomba muendelee kuhabarisha na msiruhusu upotoshaji kufanyika” alisema Mkurugenzi Msigwa

Pia Mkurugenzi Msigwa aliendelea kusema kuwa ajali haina kinga na inaweza kutokea mahali popote na mtu yeyote akiwa kwenye eneo ambalo ajali imetokea anao wajibu wa kusaidia kukabiliana na madhara ya ajali, ni moja kati ya misingi ya kukabiliana na Majanga

“Sasa hivi wameanza kujitokeza wachambuzi mbalimbali wanaosema kila mtu la kwake, naomba muwe weledi chukueni taarifa kwenye vyanzo sahihi, mamlaka sahihi na taasisi sahihi ili msije jikuta mnaingia kwenye mkumbo wa watu ambao wanaeneza taarifa zisizo sahihi zinazoleta taharuki kwa wananchi na kuzalisha lawama zisizo na msingi” alisisitiza Gerson Msigwa

Mkurugenzi Msigwa aliendelea kusema kuwa Serikali itaanza maramoja kununua vifaa na kuvipeleka maeneo mbalimbali ambapo majanga yanaweza kutokea, tutafundisha wataalam pamoja na kuifundisha jamii juu ya masuala ya namna bora ya kukabiliana na majanga

“Serikali haiwezi kuwa na dhamira ya kuacha Watanzania waangamie pale majanga yanapotokea, kwenye ajali hii tumejitahidi kuhakikisha tunatumia njia yoyote inayowezekana kuhakikisha kwamba tunapunguza madhara ya ajali” alisema Msigwa

Majanga yalikuwa yanahudumiwa na kitengo ndani ya Ofisi ya Waziri Mkuu sasa tumekuja na Sheria mpya ambayo inabana ni namna gani tunatakiwa kuitekeleza, na hiyo ni fursa muhimu katika nchi juu ya kukabiliana na majanga pindi yanapotokea