Wafanyabiashara Ndogondogo Kunufaika, Vitambulisho Vilivyoboreshwa

Imewekwa : February 20th, 2024

Benton Nollo na Shadida Salum, TTC

Watendaji wa Kata 15 na Mitaa 71 ya Halmashauri ya Mji Tunduma wamepatiwa mafunzo ya matumizi ya Mfumo wa Utambuzi, Usajili na Utoaji wa Vitambulisho kwa Wafanyabiashara Ndogondogo (WBN-MIS).

Mafunzo hayo yametolewa na timu ya Wataalamu kutoka Divisheni ya Maendeleo ya Jamii, Divisheni ya Biashara, Viwanda na Uwekezaji pamoja na Kitengo cha Teknolojia ya Habari na Mawasiliano (TEHAMA) kwenye Ukumbi wa Mikutano wa Halmashauri hiyo tarehe 20 Februari 2024.

Afisa Biashara Halmashauri ya Mji Tunduma, Abutwalibu Vunja amesema kuwa vitambulisho hivyo vitatolewa kwa Wafanyabiashara Wadogodogo watakaotimiza taratibu zote za usajili ikiwa ni pamoja na kuhakikiwa, kuthibitishwa na kuruhusiwa na Afisa wa Serikali aliyeidhinishwa kwenye Mfumo.

“Mfanyabiashara atakayetimiza taratibu zote atalipia shilingi elfu ishirini tu (Tshs. 20,000/=), kisha atapatiwa Kitambulisho ambacho kitadumu kwa miaka mitatu na baada ya muda huo atapaswa kulipa shilingi elfu tano (Tshs. 5,000/=) kwa ajili ya kuhuisha kitambulisho chake” Alisema Vunja.

Naye Afisa TEHAMA, Daudi Siame amebainisha sifa ambazo Mfanyabiashara anatakiwa kuwa nazo ili kuweza kupata kitambulisho hicho kuwa ni lazima awe mkazi anayetambulika na uongozi wa mtaa/kijiji, awe na Kitambulisho cha Taifa au namba ya NIDA, aweze kulipia gharama ya ada ya usajili na awe na barua ya utambulisho kutoka katika Serikali ya Mtaa/Kijiji.

Siame aliongeza kuwa pamoja na vigezo hivyo pia, Mfanyabiashara huyo anapaswa kuwa anatambulika na uongozi wa wafanyabiashara katika eneo husika.

Aidha,  Afisa Maendeleo ya Jamii, Husna Mpota ameleza faida ambazo Mfanyabiashara atanufaika nazo akiwa na kitambulisho hicho kuwa ni pamoja na kutambulika na Mamlaka mbalimbali ikiwemo Ofisi ya Mkurugenzi wa Halmashauri, Mamlaka ya Mapato Tanzania - TRA, Jeshi la Polisi na Taasisi za Kifedha, kuweza kupata mikopo, kuhifadhi fedha na kukamilisha miamala mbalimbali ya malipo kwa njia ya kidigitali.

“Kitambulisho hiki pia kitampa Mfanyabiashara Ndogondogo kipaumbele cha kupata maeneo bora ya kufanyia biashara katika miundombinu ya masoko itakayokuwa inajengwa katika maeneo yao na kuweza kuunganishwa na mifuko ya hifadhi ya jamii” Amesema Mpota.

 Zoezi la uzinduzi wa Mfumo huo lilifanywa na Mkuu wa Mkoa wa Songwe Dkt. Francis Michael kwenye Ukumbi wa Mikutano wa Ofisi ya Mkuu wa Mkoa huo tarehe 16 Februari 2024.

Matukio katika Picha: