WAGANGA WAKUU WAASWA KUHAMASISHA MATONE YA VITAMINI A KWA WATOTO

Imewekwa : February 1st, 2023

Waganga Wakuu wa Halmashauri zote nchini wamehimizwa kuhamasisha utolewaji wa matone ya vitamin A kwa watoto wenye umri chini ya miaka mitano.

Hatua hiyo itasaidia kuimarisha kinga ya mwili na kuzuia vifo vya watoto chini ya miaka mitano vinavyosababishwa na ulaji duni wa vyakula mchanganyiko.

Rai hiyo imetolewa Februari mosi, 2023 na Afisa Lishe kutoka OR-TAMISEMI, Bi. Asiatu Mbwambo wakati wa kikao kazi cha timu ya usimamizi shirikishi kutoka OR-TAMISEMI na watoa huduma wa kituo cha afya Matemanga kilichopo Wilayani Tunduru.

Alisema msingi wa lishe unaitaka watoto chini ya miaka mitano kula vyakula mchanganyiko lakini milo ambayo wanapewa watoto haikidhu makundi matano ya vyakula.

" Watoto wanatakiwa kula vyakula mchanganyiko lakini milo yetu haikidhi aina ya vyakula kutoka makundi matano ya vyakula kwa hiyo matone ya vitamin A yana vitamin zinazosaidia kuboresha afya na kuimarisha ukuaji wa mtoto."

" Upungufu wa vitamini A mwilini unaweza kusababishwa na uwepo wa maradhi ingawa sababu kuu ni ulaji wa vyakula visivyo na vitamini A ya kutosha," amesema Mbwambo

Amesema kuwa utolewaji wa matone ya vitamini A kwa watoto wenye umri chini ya miaka mitano ni moja ya mikakati ya Serikali ya kuboresha afya za watoto baada ya tafiti kuonesha kwamba upungufu wa vitamini A kwa watoto huchangiwa pia na hao ulaji duni.

Mbwambo alitumia fursa hiyo kutoa wito kwa wazazi na walezi wote wenye watoto walio chini ya miaka mitano kuhakikisha wanawapeleka watoto kupata matone ya vitamini A katika kampeni zinazofanyika kila mwezi Juni na Desemba nchi nzima.

Amesema ni muhimu sana wazazi au walezi kuzingatia ulishaji wa vyakula mchanganyiko kutoka makundi matano ya vyakula ambavyo vina uwezo wa kuwapatia watoto virutubisho vya kutosha na kuwawezesha watoto kukua vizuri kimwili na kiakili.