Wananchi Tunduma Wahimizwa Kupanda, Kutunza Miti

Imewekwa : January 11th, 2024

Benton Nollo na Shadida Salum, TTC

Wananchi katika Halmashauri ya Mji Tunduma wametakiwa kuwa na utamaduni wa kupanda na kutunza miti iliyopandwa kwa ajili ya kuhifadhi mazingira ya kizazi cha sasa na cha baadaye.

Rai hiyo imetolewa na Mwakilishi wa Mkuu wa Wilaya ya Momba ambaye ni Afisa Tarafa wa Tarafa ya Tunduma, Damson Mwamahonje baada ya zoezi la upandaji miti wakati wa ufunguzi wa Siku ya Upandaji Miti mwaka 2024 Halmashauri ya Mji Tunduma lililofanyika kwenye Msitu wa DANIDA uliopo Mtaa wa Kaloleni Kata ya Kaloleni tarehe 11 Januari 2024.

Mwamahonje amesema miti inakufa kwa sababu baada ya kupandwa jamii haikumbuki kuwa ina wajibu wa kuendelea kutunza miti hiyo isife na badala yake ikue ambapo kwa kufanya hivyo lengo mahsusi la utunzaji wa mazingira linakuwa limefikiwa kikamilifu.

“Viongozi na Wananchi wenzangu ambao leo tumeshiriki zoezi hili tutambue kuwa kupanda miti ni hatua moja lakini kuitunza miti hiyo ni hatua nyingine…tukumbuke kuwa tunapopanda miti na kuitunza ikakua, kwa pamoja tunakuwa tumefikia malengo halisi yaliyokusudiwa.” Amesema Mwamahonje na kuongeza;

“Sisi kama Serikali tutatenga siku maalum ya kukagua miti iliyopandwa mwaka jana ili tufanye tathmini na kuona kama miti hiyo ilipata matunzo yanayostahili pamoja na kuweka mifumo ya kutunza miti itakayopandwa mwaka huu na miaka ijayo ili miti hiyo isipotee bure na kufifisha juhudi tulizozitoa.”

Pia, Mwamahonje ameikumbusha na kuihimiza jamii kutunza na kuhifadhi vyanzo vya maji ambapo amewataka Wataalam wa Halmashauri kuzalisha miti ya kutosha na ambayo ni rafiki kwa vyanzo vya maji.

Aidha, Mwamahonje ametumia nafasi hiyo kuwaasa Wananchi kuchukua tahadhari kwa kujikinga na Ugonjwa wa Kipindupindu kwa kuzingatia usafi wa mazingira. Amewaagiza Watendaji wa Mitaa na Kata kuhakikisha kuwa kila kaya ina choo na kitumike ipasavyo na amewahimiza Wananchi wasio na vyoo, kuhakikisha kuwa wanajenga mara moja kabla ya kuchukuliwa hatua za kisheria.

Naye, Mwenyekiti wa Halmashauri ya Mji Tunduma, Mhe. Ayub Mlimba ameishukuru na kuipongeza Ofisi ya Mkuu wa Wilaya ya Momba pamoja na Wataalam wa Halmashauri kwa kusimamia vema suala la utunzaji wa mazingira kwa kupanda miti ya kutosha.

“Mheshimiwa Mgeni Rasmi mimi pamoja na Waheshimiwa Madiwani wenzangu tunaunga mkono juhudi za Serikali katika kuboresha mazingira na ninaahidi tutasimamia zoezi hili kuanzia sasa hatua kwa hatua kwenye kata, mtaa mpaka nyumba ili kuona miti hii inapandwa na kutunzwa.” Amesema Mhe. Mlimba.

Awali akisoma taarifa ya ufunguzi wa Msimu wa Upandaji Miti mwaka 2024 kwa niaba ya Mkurugenzi wa Halmashauri ya Mji, Afisa Misitu wa Halmashauri hiyo Zawadi Mwampashe amesema mpaka sasa miti 502,000 imezalishwa katika vitalu 6 huku miti 725 ikipandwa siku hiyo.

Mwampashe amesisitiza kuwa jamii inatakiwa kuhakikisha kuwa kila kaya inapanda miti isiyopungua 5 ambapo ameahidi kuendelea kutoa elimu kwa jamii juu ya umuhimu wa upandaji na utunzaji wa miti.

Matukio katika Picha: