Wapelekeni Watoto Kuchanjwa: DC Kihongosi

Imewekwa : February 9th, 2024

Na Benton Nollo, TTC

Mkuu wa Wilaya ya Momba, Mhe. Kenani Kihongosi amewataka Wazazi na Walezi kuwapeleka watoto katika vituo vya kutolea huduma za afya ili wakapatiwe chanjo kuwakinga na Ugonjwa wa Surua Rubella.

Kihongosi ametoa kauli hiyo wakati akifungua kikao cha Kamati ya Afya ya Msingi Halmashauri ya Mji Tunduma kilichoketi kwa ajili ya maandalizi ya kuanza kwa Kampeni ya Taifa ya Chanjo ya Surua Rubella inayotarajiwa kuanza nchi nzima tarehe 15 hadi 18 Februari 2024.

“Kumekuwa na tabia ya baadhi ya Wazazi au Walezi kupuuza jitihada za Serikali katika kuhakikisha wananchi wake wananjikinga dhidi ya magonjwa yanayoleta madhara kwa jamii ikiwemo ugonjwa huu wa Surua Rubella…magonjwa ambayo watoto wetu wasipochanjwa huenda wakapata madhara makubwa na wakati mwingine wakapoteza maisha jambo ambalo ni hasara kwa familia na taifa kwa ujumla.” Amesema Kihongosi.

Akizungumza katika kikao hicho, Mratibu wa Chanjo Halmashauri ya Mji Tunduma, Nasri Mohamed alisema lengo kuu la kampeni hiyo ni kuzuia, kuenea kwa ugonjwa wa Surua na Rubella.

“Wajumbe Kampeni hii imedhamiria kuongeza kinga kwa walengwa, hata kama wameshapata chanjo katika utaratibu wa kawaida wa kutoa huduma za chanjo.” Amesema Mohamed.

Mohamed alisema chanjo hiyo itahusisha Watoto wenye umri wa kuanzia miezi 9 hadi chini ya miaka mitano (miezi 9 hadi miezi 59) na itatolewa bure kwenye vituo vyote vya kutolea huduma za afya na maeneo maalum yaliyoandaliwa katika Halmashauri ya Mji Tunduma.

Mratibu huyo alisema Surua ni ugonjwa unaosababishwa na  virusi  vinavyoenezwa kwa njia ya hewa, ambapo dalili za ugonjwa huo ni homa, mafua, kikohozi, macho kuwa mekundu na kutoa majimaji na vipele vidogo vidogo ambavyo huanza kwenye paji la uso, nyuma ya masikio na kusambaa usoni na mwili mzima.

Pia, Mohamed alisema Ugonjwa wa Surua hukingwa kwa chanjo ya Surua ambayo hutolewa dozi mbili, mtoto anapofikisha umri wa miezi 9 na miezi 18.

Kwa upande wa Ugonjwa wa Rubella, Mohamed alisema unaosababishwa na virusi vya Rubella na kuenezwa kwa njia ya hewa na mara nyingi huwapata watoto wadogo ingawa unaweza kumpata mtu wa umri wowote na dalili zake hufanana na dalili za Ugonjwa wa Surua.

Surua na Rubella ni magonjwa yanayoweza kukingwa kwa chanjo kwani yasipodhibitiwa husababisha madhara makubwa kwa afya za watoto walio na umri chini ya miaka mitano na hata husababisha vifo.

Matukio katika Picha:

Mratibu wa Chanjo Halmashauri ya Mji Tunduma, Nasri Mohamed akizungumza wakati wa kikao cha Kamati ya Afya ya Msingi Halmashauri ya Mji Tunduma kilichoketi kwa ajili ya maandalizi ya kuanza kwa Kampeni ya Taifa ya Chanjo ya Surua Rubella inayotarajiwa kuanza nchi nzima tarehe 15 hadi 18 Februari 2024. Mwenyekiti wa kikao hicho alikuwa Mkuu wa Wilaya ya Momba, Mhe. Kenani Kihongosi. 

Baadhi ya Wajumbe wa Kamati ya Ulinzi na Usalama Wilaya ya Momba wakiwa katika kikao cha Kamati ya Afya ya Msingi Halmashauri ya Mji Tunduma kilichoketi kwa ajili ya maandalizi ya kuanza kwa Kampeni ya Taifa ya Chanjo ya Surua Rubella inayotarajiwa kuanza nchi nzima tarehe 15 hadi 18 Februari 2024. Mwenyekiti wa kikao hicho alikuwa Mkuu wa Wilaya ya Momba, Mhe. Kenani Kihongosi. 

Baadhi ya Viongozi wa Dini na Kimila wakizungumza wakati kikao cha Kamati ya Afya ya Msingi Halmashauri ya Mji Tunduma kilichoketi kwa ajili ya maandalizi ya kuanza kwa Kampeni ya Taifa ya Chanjo ya Surua Rubella inayotarajiwa kuanza nchi nzima tarehe 15 hadi 18 Februari 2024. Mwenyekiti wa kikao hicho alikuwa Mkuu wa Wilaya ya Momba, Mhe. Kenani Kihongosi. 

Baadhi ya Wajumbe ya Wajumbe wa Kamati ya Afya ya Msingi Halmashauri ya Mji Tunduma wakiwa katika kikao cha Kamati hiyo kilichoketi kwa ajili ya maandalizi ya kuanza kwa Kampeni ya Taifa ya Chanjo ya Surua Rubella inayotarajiwa kuanza nchi nzima tarehe 15 hadi 18 Februari 2024. Mwenyekiti wa kikao hicho alikuwa Mkuu wa Wilaya ya Momba, Mhe. Kenani Kihongosi.