WATENDAJI NA WENYEVITI WA MITAA TUNDUMA WAPEWA SEMINA YA KUWAJENGEA UWEZO

Imewekwa : January 8th, 2023

Tunduma: Viongozi ngazi ya Kata na Mitaa ya Halmashauri ya Mji Tunduma wamepewa mafunzo ya kuwajengea uwezo katika utekelezaji wa majukumu yao. Semina hiyo iliyodumu kwa muda wa siku tatu kuanzia Januari 6 – 8, 2023 imekuwa mahususi katika kuwakumbusha Majukumu yao ili kuweza kuwatumikia wananchi kikamilifu.

Mkuu wa Wilaya ya Momba Mhe. Fack Lulandala amewataka Watendaji wa Kata, Watendaji wa Mitaa na Wenyeviti wa Mitaa yote ya Halmashauri ya Mji Tunduma kwenda kuyafanyia kazi yale yote waliyofundishwa kwa siku tatu ili kutoa matokeo chanya

“Mafunzo haya mliyoyapata hapa ni kukumbushana majukumu yenu ili msifanye kazi kwa mazoea bali weledi mkubwa na kwenda kutatua changamoto zote mlizokuwa mnazipata hapo awali kwa ufanisi wa hali ya juu” alisisitiza DC Lulandala

Nilipoambiwa na mkurugenzi kuwa anaandaa mafunzo kwa ajili yenu nilifurahi na kufarijika sana kwani niliamini kuwa mafunzo haya yatakuwa ni nguzo bora kwa utawala bora katika kuwatumikia watanzania.

“Nakupongeza sana Mkurugenzi wa Mji waTunduma Bwana Philemoni Magesa kwa kufanya maamuzi ya kuwapatia mafunzo viongozi hawa kwani umetambua mafanikio yoyote ndani ya Halmashauri huanzia katika ngazi ya viongozi hawa wa kata na mitaa hongera sana” alipongeza DC Lulandala

Nae Mkurugenzi wa Halmashauri ya Mji Tunduma Ndugu Philemon Magesa amesema kuwa Halmashauri ya Mji Tunduma imeshapanga Bajeti kwa ajili mafunzo ya viongozi na mafunzo hayo sio tu kwa wakuu wa Divisheni na Vitengo bali ni kwa watumishi wote kuanzia ngazi ya Mitaa hadi ngazi ya Halmshauri

“Utaratibu huu sio mwisho ni endelevu na kila mwaka tumejiwekea walau mara mbili au tatu mafunzo yafanyike ili kuwajengea uwezo watumishi mbalimbali, nia yetu Tunduma tuwe kitu kimoja kwa kuongeza ufanisi katika kulitumikia Taifa na baada ya kusoma hivi sasa inafuata mafunzo kwa vitendo yatakayohusu kusafiri na kwenda katika Halmashauri zinazofanya vizuri ili kuendelea zikujifunza” alisema Mkurugenzi Magesa

Naye mwenyekiti wa Halmashauri ya Mji Tunduma Mhe. Ayubu Mlimba aliwataka washiriki kuyatumia mafunzo hayo vema kwani Baraza la Madiwani lilipitisha bajeti kwa ajili ya mafunzo hayo huku likiamini kuwa washiriki watapata mbinu na maarifa mapya ya kuongoza na kuwatumikia wananchi vizuri

Kwa niaba ya washiriki wa mafunzo Mwenyekiti wa Mtaa wa Ihanda Kata ya Maporomoko Ndugu Abdilah Alito ameushukuru sana uongozi wa Halmashauri ya Mji Tunduma kwa kuamua kutoa mafunzo ya kuwajengea uwezo kwani jambo hili limefanya kuwakumbusha majukumu na kuwaongezea ari katika kufanya kazi

“Tunakushukuru sana Mwenyekiti wa Halmashauri ya Mji Tunduma na Mkurugenzi kwa kutupatia mafunzo haya kwani yametujenga sana na tumetoka hapa tukiwa na maarifa mapya ya kwenda kuibua miradi mipya ya maendeleo pamoja na kusimamia miradi inayotekelezwa katika mitaa na kata zetu” Alisema Mwenyekiti Alito

Mafuzo haya yalishirikisha washiriki 157 kati yao Watendaji wa Mitaa 71, Wenyeviti wa Mitaa 71 na Watendaji wa Kata 15