WATOTO WA KIKE, WANAONGOZA KUFANYIWA UKATILI.

Imewekwa : November 29th, 2022

SONGWE: Watoto wa kike wanaongoza kufanyiwa vitendo vya ubakaji, ulawiti na unyanyasaji katika jamii kutokana na wazazi/walezi kuwa bize na shughuli za kiuchumi kuliko za malezi ya watoto.

Hayo yamebainishwa na Katibu Tawala wa Mkoa wa Songwe, Bi. Happiness Seneda wakati wa uzinduzi wa siku 16 za kupinga ukatili na unyanyasaji wa kijinsia uliofanyika katika viwanja vya Sekondari ya Kisimani wilayani Mbozi.

Bi. Happiness Seneda amesema kwa kipindi cha mwaka 2020/2021 watoto 1,096 walifanyiwa vitendo vya ukatili kati ya hao watoto wa kiume 487 na wa kike 612.

Ata kwa kipindi cha miezi mitatu kuanzia Julai hadi Septemba 2022 watoto 485 wamefanyiwa ukatili, wakiume walikuwa 115 na watoto wa kike 370, hii inaonyesha jinsi gani watoto wa kike wako kwenye hatarii, amesema Katibu Tawala wa Mkoa, Bi. Happiness Seneda.

Bi. Happiness Seneda ametoa wito kwa wazazi/walezi kutimiza jukumu vyema la malezi kwa watoto pamoja na majukumu ya kutafuta uchumi ili mtoto anapokuwa nyumbani awe salama na anapokuwa shuleni awe salama.

Mkuu wa Mkoa wa Songwe, Mhe. Waziri Kindamba amemuagiza Kamanda wa Polisi Songwe kuchukua hatua kali dhidi ya wote ambao wanakuwa wamehusika kwenye ukatili dhidi ya watoto na akina mama.

Aidha, Mkuu wa Mkoa ametoa wito kwa jamii kila mtu kumlinda mtoto pale inapoonekana kuna vitendo vya ukatili dhidi yake vinatokea sio lazima awe mtoto wako kwa mzaa.

Mhe. Waziri Kindamba ametoa wito kwa watoto wote kutoa taarifa kwa mama yao, mwalimu au mtu anaye muamini pale atakapo ona anashikwa hovyo katika mwili wake na Baba, mjomba, kaka au mtu yeyote yule.

Pia, Mkuu wa Mkoa amesema Serikali itaanza kuchukua hatua kwa waganga wanaopiga ramli chonganishi na kuwashauri watu waende kubaka au wafanye vitendo visivyofaa kwa watoto wa kike ili aweze kupata mali nyingi na kuwa tajiri.

Wakati huo huo, Mhe. Waziri Kindamba amewaagiza Wakuu Wilaya kuchukua hatua kwa wazazi/walezi ambao hawawapeleki Shule watoto wao kwani nao ni ukatili dhidi ya mtoto.