WATUMISHI SHIRIKIANENI KUFANYA KAZI - MHE. KAIRUKI

Imewekwa : August 10th, 2023

Waziri wa Nchi, Ofisi ya Rais Tawala za Mikoa na Serikali za Mitaa Mhe. Angellah Kairuki amewataka watumishi wa Ofisi ya Rais - TAMISEMI na Taasisi zinazosimamiwa na Wizara hiyo kushirikiana kufanya kazi ili kuleta matokeo chanya yanayotegemewa na wananchi.

Mhe. Kairuki amesema hayo Agosti 8, 2023 alipotembelea banda la Ofisi ya Rais- TAMISEMI katika Maonesho ya Wakulima NaneNane Kitaifa Mkoani Mbeya katika viwanja vya John Mwakangale.

Amesema kila mmoja anauwezo wa kufikiri, kufanya kazi na kuleta ujuzi mpya kwa lengo la kusaidia Wizara katika utoaji wa huduma bora kwa wananchi.

“ Mungu amempa uwezo kila mtu na uwezo na ujuzi ni vizuri watumishi tushirikiane ili wananchi wetu wapate yale wanayotarajia hasa katika utoaji wa huduma bora”

Mhe. Kairuki amewataka watumishi wa OR - TAMISEMI na Taasisi zake pamoja na elimu waliyoitoa kwa wananchi katika kipindi cha Maonesho ya Wakulima NaneNane lakini pia kuhakikisha wanayachukua yale yote yaliyowasilishwa na wageni waliotembea banda la Wizara hiyo na Taasisi zake na kuyafanyia kazi.

“Ninawapongeza na nimefuraishwa sana uwepo wa Taasisi zote za TAMISEMI katika Maonesho haya ya Wakulima NaneNane sababu sisi TAMISEMI ndio watekelezaji wa shughuli za Wizara za Kisekta ikiwemo Wizara ya Kilimo tuendeleeni kufanya kazi kwa kushirikiana na ushirikiano ndio utakaoleta ufanisi katika utoaji wa huduma kwa wananchi”

Maonesho hayo yalibebwa na kauli mbiu “ Vijana na Wanawake ni Msingi Imara wa Mifumo Endelevu ya Chakula” na yalihitimishwa na Rais wa Jamhuri ya Muungano wa Tanzania Mhe. Dkt. Samia Suluhu Hassan.