MRADI WA UPIMAJI VIWANJA 600 MTAA WA MSINDE KWA FEDHA ZA MKOPO KUTOKA WIZARA YA ARDHI

Start Date: 2021-12-24

End Date: 2022-05-30

Halmashauri ya Mji Tunduma ni moja kati ya Halmashauri 54 nchini zilizokopeshwa fedha kiasi cha Sh.543,000,000/= kupitia Wizara ya Ardhi, Nyumba na Maendeleo ya Makazi kwa ajili ya utekelezaji wa mradi wa Kupanga, Kupima na Kumilikisha (KKK) viwanja 600 katika Mtaa wa Msinde Kata ya Mpemba.Fedha hizo zilipokelewa mnamo tarehe 24/12/2022.

Eneo la Mradi lililotambuliwa lipo pembeni ya Shule ya awali na Msingi ya mchepuo wa kiingereza (New Hope) upande wa kushoto wa barabara Kuu ya Mpemba-Isongole mpaka kwenye kona ya njia panda ya barabara ya zamani ya kwenda Ileje. Mradi huu ulianza kutekelezwa tarehe 24/12/2021 na kukamilika tarehe 30/05/2022.

GHARAMA YA MRADI

Mradi huu umetekelezwa kupitia Fedha za Mkopo usio na riba wa Sh. 543,000.000/= uliotolewa na Wizara ya Ardhi Nyumba na Maendeleo ya Makazi. Kiasi cha fedha kilichotumika mpaka sasa katika kukamilisha mradi huu ni Sh. 535,416,591.20. Kiasi cha Sh 7,583,408.80 kilichobaki kitatumika katika kuboresha miundombinu ya eneo lote lenye jumla ya ekari 155.

HALI YA UTEKELEZAJI WA MRADI

Mradi huu umekamilika kwa asilimia 99.9. Mradi huu umetekelezwa katika hatua kuu 7 ambazo ni uhamasishaji, utambuzi na uthamini wa ardhi na mali, Upangaji, Upimaji Ardhi, ufunguzi wa barabara ndani ya eneo la mradi, kutangaza na kuuza viwanja na hatua ya mwisho ni umilikishaji.

Jumla ya viwanja 622 vyenye ukubwa na matumizi mbalimbali vimepimwa na kuidhinishwa katika eneo lililotwaliwa kwa mujibu wa Sheria ya Utwaaji wa Ardhi ya mwaka 1967 na kulipwa fidia ya kiasi cha Sh. 469,963,100/= kwa wananchi 101 wenye mashamba yenye jumla ya ukubwa wa ekari 155. Hatua iliyobaki ni ya umilikishaji wa viwanja hivi kwa wananchi waliogawiwa baada ya maombi yao kukubaliwa na mamlaka ya Upangaji ambayo ni Halmashauri ya Mji Tunduma, pamoja na kuendelea kuboresha miundombinu ya eneo la mradi.

MANUFAA YA MRADI

Manufaa yanayotarajiwa kupatikana katika mradi huu ni kama ifuatavyo:-

1. Kuwa na Ardhi iliyopangwa, kupimwa na kumilikishwa kisheria ikiwa ni sehemu ya   utekelezaji wa mpango wa matumizi bora ya Ardhi kitaifa pamoja na kupunguza migogoro ya Ardhi.
2. Kukuza Uchumi wa Mji uliopangika kwa kuwa na maeneo ya huduma mbalimbali kama masoko, shule, maeneo ya wazi, burudani na huduma muhimu kwa jamii kama vile umeme na maji kufikika kirahisi kwa wakazi.
3. Kutokana na mauzo ya viwanja hivi, Halmashauri ya Mji inatarajia kukusanya jumla ya Sh.1,066,974,242/=, ambazo kati ya hizo Sh. 543,000,000/= zitarejeshwa Serikali Kuu ili kulipa mkopo uliotolewa bila riba na kuifanya Halmashauri ya Mji kupata mapato ya kiasi cha Sh. 523,974,242/= kama faida na kuweza kutumika katika shughuli mbalimbali za maendeleo ya Mji wa Tunduma.