Lishe bora kwa Afya imara

Halmashauri ya Mji Tunduma imeendelea kutekeleza afua mbalimbali za lishe kwa kuzingatia muongozo wa Taifa wa Lishe, Mpango wa maendeleo wa Taifa wa miaka mitano, Mpango Jumuishi wa Lishe wa Taifa (2016 – 2022) pamoja na Sera mbalimbali za Nchi.

Halmashauri ya Mji Tunduma ina Vituo vya kutolea huduma za afya 18 kati ya hivyo vituo 14 watumishi wake wamepata mafunzo ya lishe. Pia, kuna ratiba ya kutoa elimu ya lishe kila wiki kwa wazazi na walezi wanaofika kwenye vituo vya kutolea huduma za afya, ambapo kwa mwaka 2021/2022 jumla ya wazazi na walezi 65,795 walipata elimu mbali mbali ya afua za lishe, hii ni sawa na 98.8% ya wazazi na walezi 66,600 waliolengwa kufikiwa.

Aidha, Mitaa yote 71 ina wahudumu wa afya ngazi ya jamii waliopata mafunzo ya lishe, wanaotoa elimu ya lishe kwa jamii na kutembelea kaya mbalimbali kwa ajili ya kutambua watoto wenye utapiamlo, ikiwa ni pamoja na kutoa elimu kwa vitendo. Pia, huwa kunakuwa na siku ya lishe katika Vijiji/Mitaa ambapo jamii inafundishwa jinsi ya kupika uji wa mtoto kwa kutumia vyakula vilivyopo katika jamii. Aidha, kupitia vipindi vya redio, mikutano ya uhamasishaji katika jamii, Vikao vya WDC, Kamati ya lishe ya Halmashauri ya Mji Tunduma, Kampeni za utoaji wa matone ya Vitamin “A” na Maadhimisho ya wiki ya unyonyeshaji duniani, wananchi wanajengewa uelewa juu ya masuala ya lishe, ili kuepukana na utapiamlo. Jamii inaendelea kuelimishwa juu ya kutumia mchanganyiko wa vyakula mbalimbali vinavyopatikana katika maeneo yao kwa kuzingatia maelekezo ya wataalam wa Afya.

Katika kuhakikisha kuwa afua za lishe zinatekelezwa kwenye Halmashauri ya Mji Tunduma yetu: -

Wakurugenzi wa Halmshauri, walifunga mikataba na Watendaji wa Kata na Watendaji wa Kata wakafunga mikataba na watendaji wa vijiji na Mitaa, ili kusimamia shughuli zote za lishe zinazotekelezwa kwenye maeneo yao.

Kutenga bajeti ya shilingi 1,000/= kwa kila mtoto chini ya miaka 5 kwa ajili ya utekelezaji wa afua za lishe ambapo katika kipindi cha 2021/2022 Jumla ya shilingi 30,806,000= zilitengwa kutoka katika vyanzo vya mapato ya ndani kwa ajili ya utekelezaji wa shughuli za lishe.

•   Kupata nafasi ya kutoa elimu ya lishe katika radio ya Ilasi FM
•   Kushirikiana na waganga wa jadi kwa kuwaelekeza dalili za awali za utapiamlo
•   Kuhakikisha kila idara mtambuka kama MAENDELEO YA JAMII, KILIMO NA MIFUGIO, MAJI NA ELIMU inatenga bajeti kwa ajili ya utekelezaji wa afua za lishe.