Dkt. Kasululu Ahitimisha Mashindano ya UMITASHUMTA

Imewekwa : May 28th, 2025

Atwiya Mohamed na Silvesta Mtafya, TTC

Mganga Mkuu wa Mkoa wa Songwe - RMO, Dkt. Boniface Kasululu, kwa niaba ya Katibu Tawala wa Mkoa huo, tarehe 28 Mei 2025 ameshiriki katika hafla ya kufunga na kuhitimisha mashindano ya Umoja wa Michezo na Taaluma kwa Shule za Msingi Tanzania ( UMITASHUMTA) ngazi ya Mkoa.

Hafla hiyo imefanyika kwenye viwanja vya michezo vilivyopo katika Shule ya Sekondari Songwe Sunrise, iliyopo Kijiji cha Nanyara, wilayani Mbozi.

Dkt. Kasululu ameambatana na Afisa Elimu wa Mkoa, Mwalimu Majuto Njanga, na kupokelewa na Mkuu wa shule hiyo, pamoja na uongozi wa shule.

Wadhibiti wa Ubora wa Shule, Maafisa Elimu wa Halmashauri na Kata, Wakuu wa Shule jirani na Walimu Wakufunzi, Mwenyekiti wa Kijiji, Mtendaji wa Kijiji, Chifu wa Kijiji cha Nanyara, pamoja na wanafunzi kutoka shule mbalimbali za mkoa wa Songwe ni miongoni mwa washiriki katika hafla hiyo.

Mashindano hayo yalianza rasmi tarehe 25 Mei 2025 na kuhitimishwa tarehe 28 Mei 2025, ambapo lengo ni kumpata mshindi pamoja na kuunda Timu ya mkoa itakayowakilisha Mkoa wa Songwe kwenye mashindano ya kitaifa yatakayofanyika mkoani Iringa kuanzia tarehe 6 Juni 2025.

Katika mashindano hayo ambayo yame husisha Michezo mbalimbali kama vile mpira wa miguu, mpira wa pete, riadha, ngoma za asili, Uchoraji, pamoja na uimbaji, Halmashauri ya Mji Tunduma imeshika nafasi ya pili huku nafasi ya kwanza ikishikwa na Halmashauri ya Wilaya ya Songwe huku Halmashauri ya Wilaya ya Mbozi ikishika nafasi ya tatu.

Akizungumza wakati wa kufunga mashindano hayo, Dkt. Boniface Kasululu aliwapongeza walimu na wanafunzi kwa juhudi kubwa walizozionyesha, na kuwasihi wanafunzi pamoja na walimu walioteuliwa kuiwakilisha Songwe kitaifa kuongeza juhudi zaidi ili kuhakikisha mkoa unafanya vizuri katika mashindano ya kitaifa.

Mashindano ya UMITASHUMTA yameendelea kuwa chachu ya kuibua vipaji na kuimarisha mshikamano miongoni mwa wanafunzi wa shule za msingi nchini.

Matukio katika Picha: