DAS Nkinda: Ziara ya Viongozi DR Congo Ina Manufaa Tunduma, Taifa

Imewekwa : May 30th, 2025

Na Benton Nollo, TTC Sakania, DR Congo

Katibu Tawala Wilaya ya Momba, Frank Nkinda amesema ziara ya Viongozi wa ngazi ya Mkoa, Wilaya, Waheshimiwa Madiwani na Wataalam wa Halmashauri ya Mji Tunduma kutembelea mradi mkubwa wa uwekezaji wa Bandari Kavu katika eneo la mpaka la Sakania hadi Mokambo Jamhuri ya Kidemokrasia ya Congo - DR Congo na Nchi ya Zambia, ina manufaa makubwa kwa Mji wa Tunduma na taifa kwa ujumla.

Nkinda ameyasema hayo wakati wa ziara hiyo iliyofanyika tarehe 30 Mei 2025 ambapo viongozi hao walitembelea katika eneo hilo baada ya kupata mwaliko wa Kampuni ya TAZACO Investment Ltd ya jijini Dar es Salaam ili kwenda kujifunza namna ya uendeshaji wa bandari kavu na kupata uzoefu wa shughuli hizo ambapo katika eneo hilo zinasimamiwa na Kampuni ya Jiayou International Logistics Co. Ltd.

"Kwa kweli mradi huu unapendeza na unatija kubwa kwa wenzetu...kampuni hii ndiyo ambayo tunatarajia ije kwetu Tunduma kwa ajili ya uwekezaji na kutuboreshea eneo letu na kupunguza msongamano wa malori". Amesema Nkinda.

Kwa upande wake Makamu Meneja na Mkurugenzi wa Uendeshaji wa Kampuni ya Jiayou International Logistics Co. Ltd., Li Yong Qiang amesema atafurahi kuona Serikali ya Tanzania kupitia Halmashauri ya Mji Tunduma inatekeleza mradi wa ujenzi wa Bandari Kavu katika eneo la Mpemba ili kupunguza msongamano wa malori uliopo sasa na kuinua uchumi wa eneo hilo na taifa kwa ujumla kwa kuwa ndiyo Lango Kuu ya SADC.

Viongozi hao wamejifunza namna Serikali ya DR Congo ilivyoingia mkataba wa makubariano ya ukarabati wa sehemu ya kipande cha barabara kwa hadhi ya kimataifa cha Kasumbalesa - Sakania chenye Vituo vya Ushuru wa Barabara (Road Tolls) vinne pamoja na Bandari Kavu mbili za Sakania na Mokambo ambapo gharama za uwekezaji wa mradi huo ni Dola za Kimarekani milioni 229 ($229 million).

Bandari Kavu ya Sakania yenye ukubwa wa hekta 144, yamejengwa majengo makubwa mawili likiwemo la Kituo Jumuishi pamoja na maegesho ya malori huku barabara iliyokarabatiwa kwa kiwango cha lami kwa hadhi ya kimataifa ina urefu wa kilomita 145 hadi Kasumbalesa ambapo 'Road Toll' ya kwanza iliyopo Kawimba ipo umbali wa kilomita 5, ya pili ya Kabembe ipo kilomita 72, ya tatu ya Tonkoshi ipo kilomita 85 na ya nne ya Lukangaba ipo umbali wa kilomita 138 kutoka Kasumbalesa kuelekea mpaka wa Sakania. Aidha, Bandari Kavu ya Mokambo nayo ina ukubwa wa hekta 20.

Mradi huo ulizinduliwa rasmi na Rais wa Jamhuri ya Kidemokrasia ya Congo, Mhe. Felix Antoine Tshisekedi Tshilombo tarehe 03 Oktoba 2023.

Matukio katika Picha:

Viongozi wa ngazi ya Mkoa, Wilaya, Waheshimiwa Madiwani na Wataalam wa Halmashauri ya Mji Tunduma wakiwasili eneo la Bandari Kavu katika eneo la mpaka la Sakania kati Nchi ya Jamhuri ya Kidemokrasia ya Congo - DR Congo na Zambia tarehe 30 Mei 2025 ambapo viongozi hao walitembelea katika eneo hilo baada ya kupata mwaliko wa Kampuni ya TAZACO Investment Ltd ya jijini Dar es Salaam ili kwenda kujifunza namna ya uendeshaji wa bandari kavu na kupata uzoefu wa shughuli hizo ambapo katika eneo hilo zinasimamiwa na Kampuni ya Jiayou International Logistics Co. Ltd.

Meneja Mkuu wa Kampuni ya Jiayou International Logistics Co. Ltd., Mackhy Melesi akiwasilisha wasilisho la namna mradi mkubwa wa uwekezaji wa Bandari Kavu katika eneo la mpaka la Sakania hadi Mokambo Jamhuri ya Kidemokrasia ya Congo - DR Congo na Nchi ya Zambia, ulivyotekelezwa.

Makamu Meneja na Mkurugenzi wa Uendeshaji wa Kampuni ya Jiayou International Logistics Co. Ltd., Li Yong Qiang akizungumza kwa nyakati tofauti wakati wa ziara ya viongozi hao walipotembelea kujionea namna mradi mkubwa wa uwekezaji wa Bandari Kavu katika eneo la mpaka la Sakania hadi Mokambo Jamhuri ya Kidemokrasia ya Congo - DR Congo na Nchi ya Zambia, ulivyotekelezwa.