Mashindano ya UMISSETA Ngazi ya Halmashauri Yaanza Rasmi

Imewekwa : June 2nd, 2025

Na Benton Nollo, TTC

Mashindano ya Umoja wa Michezo Shule za Sekondari Tanzania (UMISSETA) ngazi ya Halmashauri ya Mji Tunduma yameanza rasmi tarehe 02 Juni 2025 katika viwanja vya michezo vilivyopo Shule ya Sekondari Mpemba.

Akizungumza kwa niaba ya Mkurugenzi wa Halmashauri ya Mji Tunduma, wakati wa ufunguzi wa Mashindano hayo Afisa Elimu Sekondari wa Halmashauri hiyo, Valentine Christopher Mkomwa amesema maandalizi yamefanyika vizuri na yanajumuisha shule zote za sekondari.

“Halmashauri yetu katika Shule ya Sekondari JK Nyerere ni Kitalu kwa Wanafunzi wa Mpira wa Miguu na wanafunzi wote 20 nao watashiriki mashindano haya.” Amesema Mkomwa.

Kwa upande wake, Mwalimu wa Michezo Halmashauri ya Mji Tunduma, Daniel Mombo ametaja michezo ambayo Halmashauri ya Mji Tunduma inashiriki ni mpira wa miguu Wavulana na Wasichana, Mpira wa Kikapu Wavulana na Wasichana, mpira wa mikono Wavulana na Wasichana, riadha na mpira wa pete.

“Nitumie nafasi hii kumshukuru Mkurugenzi wetu wa Halamashauri ya Mji Tunduma, Mariam Chaurembo kwa kazi nzuri anayoifanya hasa katika idara ya michezo, tumeona anavyojitoa kuwezesha Wanafunzi ambao wanashiriki michezo hii ya UMISSETA mpaka ngazi ya taifa…kwa kweli amekuwa bega kwa bega na sisi.” Amesema Mwalimu Mombo.

Naye, Mwalimu Lea Godwin ambaye pia ni Mwalimu wa Michezo amesema maandalizi kwa timu zote yapo vizuri na watoto wana utimamu na utayari wa kushiriki michezo mbalimbali katika mashindano hayo.

Silas Tumaini Masodas ni Mwanafunzi wa Kidato cha Nne Shule ya Sekondari Uwanjani yeye ni kepteni wa Timu ya Mpira wa Miguu Kanda B ambapo amesema maandalizi yote yamekamilika na kilichobaki ni wao kama wachezaji kutimiza wajibu wao ili kuleta ushindi kwa Halmashauri yao.

“Kwanza namshukuru Mwenyezi Mungu kwa kuchaguliwa kuwa Kepteni kwenye Zone (Kanda) yangu…nawaahidi Zone yangu tutafanya vizuri, maandalizi yote yameenda vizuri, benchi la ufundi, walimu wetu wote, kwa asilimia 90 kila kitu kipi sawa, imebaki kwetu maana maelekezo yote tumepewa…kwa upande wetu tumejipanga vizuri zaidi kwa kudra za Mwenyezi Mungu Inshaalah tutashinda hatutawaangusha.” Amesema Masodas.

Mashindano hayo ambayo hufanyika kila mwaka, hivi sasa yanafanyika ili kupata timu za michezo mbalimbali zenye jumla ya Wanafunzi 140 kwa ajili ya kishiriki mashindano hayo kwa ngazi ya mkoa hivi karibuni.

Matukio katika Picha: