BILIONI 1.5 KUTUMIKA KUJENGA SOKO LA KISASA LA KUUZIA SAMAKI NA DAGAA TUNDUMA

Imewekwa : February 11th, 2023

Na William Maganga,Tunduma

Tunduma: Serikali ya awamu ya sita inayoongozwa na Rais Mhe. Dkt. Samia Suluhu Hassan imetoa kiasi cha fedha Bilioni 1.5 kwa ajili ya kujenga soko la kisasa la kuuzia samaki na dagaa ndani ya Mji wa Tunduma ili kuongeza mapato na kuokoa upotevu wa mapato uliokuwa ukifanywa na baadhi ya wafanya biashara waliokuwa wakisafirisha bidhaa hizo kwenda nchi za SADC pasipo kulipia.

Akizungumza leo tarehe 10/2/2023 mwenyekiti wa Halmashauri hiyo Mhe. Ayoub Mlimba alisema kwa muda mrefu walikuwa wakikosa mapato kutokana na watu wengi kutunza samaki kwenye nyumba za watu zilizopo pembezoni mwa mpaka wa Tunduma na Zambia.

 Alisema uwepo wa stoo hizo uliwafanya wafanyabiashara wasio wazalendo kusafirisha shehena za Samaki na Dagaa hata usiku wa manane huku maafisa wa ukusanyaji ushuru wakishindwa kukusanya ushuru hali iliyoikosesha mapato halmashauri na hata idara husika kushindwa kukusanya takwimu sahihi.

‘’Leo tupo hapa tunasaini mkataba kwa kulipa fidia kwa wamiliki wa eneo ambapo tunatarajia kujenga Soko hilo ambalo lina ukubwa wa Hekari 3.3, kwa makubaliano ya halmashauri kuilipa familia hii Milioni 30 pamoja na viwanja 2 vyenye urefu wa mita za mraba 600 kila kimoja’’alisema Mhe. Mlimba.

Aidha Mhe. Mlimba alisema katika kipindi cha utawala wake mikataba yote itakuwa ikisainiwa eneo husika badala ya ofisini ili kuwepo na uwazi na kila mwenye malalamiko aweze kutoa ili kukwepa migogoro isiyokuwa ya lazima pia kuwafanya wananchi kushiriki tangu mwanzo wa mradi hadi kukamilika kwake.

Afisa Uvuvi wa halmashauri ya mji huo Bwana Elivathan Silwimba alisema kuwa Serikali imefanya jambo la muhimu kwani ujenzi wa soko hilo eneo hilo la Chapwa litasaidia kuzuia utoroshwaji wa samaki, hasa kutokana na jinsi mpaka ulivyokuwa wazi masaa 24 huku stoo za dagaa ziko kwenye nyumba za watu.

Aliongeza kuwa sheria za uvuvi namba 22 ya mwaka 2003 na kanuni zake za mwaka 2009 inakataza kusafirisha mazao ya uvuvi baada ya saa 12 jioni, kwani kusafirisha muda huo hakuna anayechukua takwimu.

“Kwa kipindi hiki Halmashauri ya Mji Tunduma inasafirisha Mazao ya Samaki ni gunia 2000 na dagaa ni gunia 5000 kwa mwaka, nina Imani ujenzi wa soko hili takwimu hizi zitaongezeka maradufu” alisisitiza Silwimba

Mkurugenzi wa Halmashauri ya Mji Tunduma Ndugu Philemon Magesa alisema serikali imekuwa ikiwapatia fedha nyingi kwa ajili ya miradi mbalimbali ya maendeleo na kwa ujio wa Bilioni 1.5 kwa ajili ya ujenzi wa soko hilo kutaongeza chachu ya kiuchumi kwa serikali na mtu mmoja mmoja.

Alisema mradi utakapokamilika wataweza kujenga barabara zitakazofunguka na kulifanya eneo hilo la Chapwa kushangamka kiuchumi kwani watu wengi watafungua biashara maeneo hayo wakiwemo mama lishe hivyo wanatarajia kuukamilisha mradi huo kwa wakati ili kuleta manufaa kwa wananchi.