Bilioni 16.1 Kutekeleza Miradi ya Maendeleo Tunduma TC

Imewekwa : October 31st, 2023

Mkurugenzi wa Halmashauri ya Mji Tunduma, Philemon Magesa amesema Halmashauri hiyo kwa mwaka wa fedha 2023/2024 imeidhinishiwa shilingi bilioni 16.1 kwa ajili ya utekelezaji wa miradi ya maendeleo.

Magesa ameyasema hayo alipokuwa akiwasilisha taarifa ya utendaji kazi wa Halmashauri  wakati wa kikao cha Baraza la Madiwani kwa kipindi cha robo ya kwanza ya mwaka wa fedha 2023/2024 kilichoketi kwenye Ukumbi wa Mikutano wa Halmashauri hiyo tarehe 31 Oktoba 2023.

Kati ya fedha hizo shilingi bilioni 7.8 ni kutokana na mapato ya ndani, shilingi bilioni 5.1 kutokana na Ruzuku ya Maendeleo kutoka Serikali Kuu na shilingi bilioni 3.1 kutoka kwa Wahisani.

Aidha, shilingi bilioni 7.1 zilizovuka mwaka 2022/2023 zimefanya Bajeti ya miradi ya maendeleo kwa mwaka wa fedha 2023/2024 kufikia shilingi bilioni 23.2.

Kadhalika, hali ya makusanyo na mapokezi ya fedha kwa Halmashauri ya Mji Tunduma kwa kipindi cha kuanzia mwezi Julai hadi Septemba, 2023 ni shilingi bilioni 10.07 sawa na asilimia 28.11 ya makisio ya shilingi bilioni 35.8 kwa mwaka 2023/2024.

Kupitia Mapato ya Ndani, Halmashauri ya Mji Tunduma kwa kipindi cha Julai hadi Septemba, 2023 imekusanya shilingi bilioni 3.3 sawa na asilimia 23.71 ya makisio ya mwaka wa fedha 2023/2024 ambayo ni shilingi bilioni 13.76.

Pamoja na mambo mengine kikao hicho kilianza na maswali ya papo kwa papo na kisha kupokea taarifa za Kamati za Kudumu za Halmashauri kwa kipindi cha robo hiyo.

Matukio Katika Picha Wakati wa Mkutano wa Baraza la Madiwani: