Chaurembo Ahimiza Wananchi Kujiandikisha, Ataja Bilioni 4.3 za Mikopo

Imewekwa : October 19th, 2024

Na Benton Nollo, TTC

Msimamizi wa Uchaguzi Halmashauri ya Mji Tunduma ambaye pia ni Mkurugenzi wa Halmashauri hiyo, Mariam Chaurembo amewahimiza Wananchi wa Mji wa Tunduma kutumia muda uliobaki kujiandikisha kwa ajili ya kushiriki Uchaguzi wa Serikali za Mitaa utakaofanyika tarehe 27 Novemba 2024.

Chaurembo ametoa wito huo alipokuwa akizungumza kabla ya kumkaribisha Mkuu wa Wilaya ya Momba, Mhe. Elias Mwandobo kufunga Songwe Route Match 2024 kwa niaba ya Mkuu wa Mkoa wa Songwe, Mhe. Daniel Chongolo baada ya utoaji wa zawadi kwa Washiriki wa michezo mbalimbali iliyofanyika kwenye Uwanja wa Shule ya Msingi Tunduma tarehe 19 Oktoba 2024.

"Naomba nieendelee kuwahamasisha Wananchi katika siku mbili zilizobaki, kujitokeza kwa wingi kujiandikisha katika Daftari la Orodha ya Wapiga Kura ili wapate sifa za kushiriki Uchaguzi wa Serikali za Mitaa." Amesema Chaurembo.

Chaurembo amesema zoezi la uandikishaji limeanza tangu tarehe 11 Otoba 2024 na litahitimishwa tarehe 20 Oktoba 2024 ambapo vituo vya kujiandikisha vinafunguliwa saa 2:00 asubuhi na kufungwa saa 12:00 jioni.

Aidha, Chaurembo ameendelea kuwakumbusha Wananchi wa Mji wa Tunduma hasa Wanawake, Vijana na Wenye Ulemavu kujitokeza kuomba mikopo ya Asilimia Kumi (10%) ambayo dirisha la uotoaji wa mikopo hiyo tayari lineshafumguliwa.

"Mikutano ya uhamasishaji tayari tumeshafanya na wakati tunafanya mikutano ya uhamasishaji tulikuwa na shilingi bilioni 4.1 laking mpaka sasa Halmashauri ina shilingi bilioni 4.3...fedha hizi zipo na ni zao." Amesema Chaurembo na kuongeza;

 "Serikali imeboresha utoaji wa mikopo hii, hivi sasa umri kwa vijana umeongezeka kutoka miaka 18 hadi miaka 45  wakati awali ukomo ulikuwa miaka 35."

Matukio katika Picha: