Chongolo: Nimekuja Kufanya Kazi

Imewekwa : March 19th, 2024

Na Benton Nollo, TTC

Mkuu wa Mkoa wa Songwe, Mhe. Daniel Chongolo amewaeleza Viongozi na Wataalam mbalimbali waliohudhuria hafla fupi ya makabidhiano ya Ofisi ya Mkuu wa Mkoa wa Songwe yaliyofanyika baina yake na aliyekuwa Mkuu wa Mkoa huo, Dkt. Francis Michael, kuwa amekuja kufanya kazi kwa niaba ya Rais wa Jamhuri ya Muungano wa Tanzania na si vinginevyo.

Mhe. Chongolo ametoa kauli hiyo wakati wa hafla hiyo iliyofanyika kwenye Ukumbi wa Mikutano wa Ofisi ya Mkuu wa Mkoa wa Songwe tarehe 19 Machi 2024.

"Itoshe tu kusema nimekuja kufanya kazi kwa niaba ya Mheshimiwa Rais na si vinginevyo…hivyo nategemea ushirikiano wenu nyote ili tumsaidie Rais wetu katika dhamira yake ya dhati ya kuwatumikia Wananchi." Alisema Mhe. Chongolo.

Chongolo amewataka Viongozi mkoani humo kufanya kazi zenye matokeo yenye tija kwa Wananachi kwani wanakabiliwa na changamoto mbalimbali ambazo wa kuzitatua ni wao.

Kiongozi huyo alisema Viongozi wa Mkoa huo wanawajibu wa kuwatumikia wananchi kama ambavyo Rais amekuwa akijitoa kwa kutatua kero zao kwa kuleta fedha nyingi ili zitumike kuboresha miundombinu na huduma mbalimbali kwa Wananchi.

Aidha, Chongolo alisema ujio wake katika Mkoa Songwe umelenga kufanya kazi na si vinginevyo hivyo, yupo tayari kushirikiana nao.

Hata hivyo, kwa upande wake Dkt. Francis Mkuu wa Mkoa aliyestaafu amemshukuru Rais Dkt. Samia Suluhu Hassan kwa kumuamini na kuwatumikia Wananchi wa Songwe.

Chongolo anakuwa Mkuu wa Mkoa wa Sita tangu kuanzishwa kwa Mkoa huo mwaka 2016.

Matukio katika Picha: