DC Mgomi Mgeni Rasmi Mahafali ya Kwanza Dkt. Samia SH

Imewekwa : April 25th, 2025

Atwiya Mohamed na Silvesta Mtafya, TTC

Mkuu wa Wilaya ya Ileje, Mhe. Farida Mgomi akimuwakilisha Mkuu wa Mkoa wa Songwe, Mhe. Daniel Chongolo, amekuwa mgeni rasmi wa kwanza katika Mahafali ya Kwanza ya Kidato cha Sita katika Shule ya Sekondari ya Wasichana ya Dkt. Samia SH yaliyofanyika shuleni hapo tarehe 25 Aprili 2025.

Mhe. Mgomi amewapongeza viongozi wa Wilaya ya Momba, Halmashauri ya Mji Tunduma, Walimu pamoja na Wazazi kwa maandalizi mazuri ya mahafali hayo ya kwanza na kihistoria.

"Niwatie moyo katika kipindi hiki cha maandalizi yenu ya mwisho kuelekea mtihani wenu wa taifa...mtakapokuwa katika chumba cha mtihani kuweni watulivu katika kujibu maswali, kubwa na muhimu ni kujiamini na sisi tunawaamini kwani mnao uwezo mkubwa wa kufanya vizuri." Amesema Mhe. Mgomi na kuongeza;

"Mkoa wa Songwe unaona fahari kubwa kuwa na ninyi hasa ikizingatiwa ninyi ndiyo zao la kwanza la Shule ya Wasichana katika Mkoa wetu wa Songwe...matarajio tuliyonayo kwenu ni makubwa katika matokeo na hata baada ya matokeo ili mje kulitumikia taifa letu."

Mhe. Mgomi amesisitiza kuwa Mkoa unatarajia kubebwa kwa matokeo mazuri yatakayotokana na wahitimu hao.

"Niwaombe mkawe mabalozi wazuri wa Serikali na Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania ambaye jina lake limetumika kama jina la Shule yenu...msituangushe." Amesisitiza Mhe. Mgomi na kuongeza;

"Mmekuwa hapa kama timu moja na mmeishi kwa kushirikiana lakini kila mmoja ana ndoto yake na matamanio ya kesho yake, nendeni mkaziishi ndoto zenu mlizo nazo na Tanzania bora ya kesho inawahitaji na taifa linawategemea."

"Niwatakie kheri na baraka Wahitimu wote katika Mtihani wenu wa taifa wa Kidato cha Sita, lakini pia niwatakie maisha mema hata baada ya kuhitimu masomo yenu." Amesema Mhe. Mgomi.

Akizungumza awali Mkuu wa Shule hiyo, Anna Salutary Mushi amesema mpaka sasa Shule hiyo ina Walimu 22 na Wanafunzi 614 wa kidato cha Kwanza, Pili, Tano na Sita ambapo kati yao wanaohitimu ni 181.

Mushi amesema kuwa mpaka kukamilika kwa Shule hiyo itachukua Wanafunzi 920 ambapo Tahasusi zilizopo ni PCB, PCM, EBG, HGE, HKL na HGK.

Matukio katika Picha: