DCC Yaridhia Bilioni 36.3 Zitumike Tunduma

Imewekwa : January 31st, 2024

Na Benton Nollo, TTC

Kamati ya Ushauri ya Wilaya ya Momba – DCC imeridhia na kupitisha rasimu ya Makadirio ya Makusanyo ya Mapato na Matumizi ya shilingi bilioni 36.3 yatumike na Halmashauri ya Mji Tunduma kwa mwaka wa fedha 2024/2025.

Kikao hicho ambacho kimeongozwa na Mwenyekiti wa Kamati hiyo ambaye ni Mkuu wa Wilaya ya Momba, Mhe. Kenani Kihongosi kimefanyika kwenye Ukumbi wa Mikutano wa Halmashauri ya Wilaya ya Momba, Chitete tarehe 31 Januari 2024.

Akizungumza wakati wa kikao hicho Mhe. Kihongosi alisema baada ya Bajeti hiyo kuidhinishwa na Bunge, Halmashauri ya Mji Tunduma ihakikishe kuwa bajeti hiyo inaheshimiwa na inatekelezwa kama ilivyoidhinishwa.

“Niwaombe sana Waheshimiwa Madiwani na Wataalam wetu tujifunze kuheshimu fedha za umma na kusimamia utekelezaji wa miradi kama mipango inavyotuelekeza ili thamani ya fedha katika miradi husika ionekane na iwanufaishe na kuleta tija kwa Wananchi. Alisema Mhe. Kihongosi.

Awali akiwasilisha mapendekezo ya Makadirio ya Makusanyo ya Mapato na Matumizi ya Halmashauri ya Mji Tunduma kwa mwaka wa fedha 2024/2025, Mkuu wa Divisheni ya Mipango na Uratibu, Belton Garigo alifafanua kuwa kati ya shilingi bilioni 36.3 zinazopendekezwa, shilingi bilioni 13.8 ni kutokana na vyanzo vya ndani, shilingi milioni 950.3 kwa ajili ya ruzuku ya uendeshaji (OC), shilingi bilioni 13.2 ni mishahara na shilingi bilioni 8.2 ni kwa ajili ya miradi ya maendeleo kutoka Serikali Kuu na Wahisani.

Aidha, pamoja na makisio hayo pia, Kamati hiyo imeridhia makisio ya matumizi ya shilingi bilioni 16.1 kwa ajili ya miradi ya maendeleo (shilingi bilioni 8.254 kutoka Serikali Kuu na Wahisani na shilingi bilioni 7.852 fedha za maendeleo zinazotokana na mapato ya ndani).

Kikao hicho maalum kimehudhuriwa na Halmashauri zote mbili za Wilaya ya Momba kwa lengo la kupitisha mapendekezo ya makisio ya Mipango na Bajeti kwa Halmashauri hizo kwa mwaka 2024/2025.

Matukio katika Picha:

Mwenyekiti wa Kamati ya Ushauri ya WiIaya ya Momba - DCC ambaye pia ni Mkuu wa Wilaya hiyo, Mhe. Kenani Kihongosi akizungumza wakati wa kikao maalum cha Kamati hiyo kilichoketi kwa ajili ya kujadili na kuridhia Mapendekezo ya Mpango na Bajeti ya Halmashauri zote mbili (Halmashauri ya Mji Tunduma na Halmashauri ya Wilaya ya Momba) kwa mwaka wa fedha 2024/2025 kilichofanyika kwenye Ukumbi wa Mikutano wa Halmashauri ya Wilaya ya Momba, Chitete tarehe 31 Januari 2024.

Viongozi na Wajumbe Kamati ya Ulinzi na Usalama WiIaya ya Momba wakisoma kwa makini kabrasha la rasimu ya mapendekezo ya Mpango na Bajeti ya Halmashauri ya Mji Tunduma kwa mwaka wa fedha 2024/2025 wakati wa kikao cha Kamati ya Ushauri ya Wilaya hiyo - DCC  kilichofanyika kwenye Ukumbi wa Mikutano wa Halmashauri ya Wilaya ya Momba, Chitete tarehe 31 Januari 2024.

Mwenyekiti wa Halmashauri ya Mji Tunduma, Ayubu Mlimba akizungumza mara baada ya Mapendekezo ya Mpango wa Bajeti ya Halmashauri hiyo kwa mwaka wa fedha 2024/2025 kuwasilishwa kwenye kikao Maalum cha Kamati ya Ushauri ya Wilaya ya Momba - DCC kilichofanyika kwenye Ukumbi wa Mikutano wa Halmashauri ya Wilaya ya Momba, Chitete tarehe 31 Januari 2024.

Mkuu wa Divisheni ya Mipango na Uratibu Halmashauri ya Mji Tunduma, Belton Garigo akiwasilisha Mapendekezo na Mpango wa Bajeti ya Halmashauri hiyo kwa mwaka wa fedha 2024/2025 kwenye kikao Maalum cha Kamati ya Ushauri ya Wilaya ya Momba - DCC kilichofanyika kwenye Ukumbi wa Mikutano wa Halmashauri ya Wilaya ya Momba, Chitete tarehe 31 Januari 2024.

Mwenyekiti wa Halmashauri ya Mji Tunduma, Ayubu Mlimba (kushoto) akiteta jambo na mwakilishi wa Mkurugenzi wa Halmashauri ya Mji Tunduma, Mwanaisham Nassor (kulia) wakati wa kikao Maalum cha Kamati ya Ushauri ya Wilaya ya Momba - DCC kilichofanyika kwenye Ukumbi wa Mikutano wa Halmashauri ya Wilaya ya Momba, Chitete tarehe 31 Januari 2024  kwa ajili ya kujadili Mapendekezo na Mpango wa Bajeti ya Halmashauri hiyo kwa mwaka wa fedha 2024/2025.

Wakuu wa Divisheni na Vitengo wakifuatilia uwasilishaji wa mapendekezo ya Mpango na Bajeti ya Halmashauri ya Mji Tunduma kwa mwaka wa fedha 2024/2025 wakati wa kikao cha Kamati ya Ushauri ya Wilaya hiyo - DCC  kilichofanyika kwenye Ukumbi wa Mikutano wa Halmashauri ya Wilaya ya Momba, Chitete tarehe 31 Januari 2024.