FUATENI MAELEKEZO MLIYOPEWA HATUTAMUONEA AIBU YEYOTE ATAKAYE HARIBU KAZI

Imewekwa : April 28th, 2023

Na William Maganga – Tunduma TC

Mwenyekiti wa Halmashauri ya Mji Tunduma Mhe. Ayubu Mlimba amewataka mafundi wote waliopata kazi mbalimbali kuhakikisha wanafanya kazi kwa Ubora unaofaa

Mhe. Mlimba ameyasema hayo wakati wa Halfa ya kusaini mikataba yenye Thamani ya Tsh. 814,000,000/= kati ya Halmashauri ya Mji Tunduma na mafundi hao ambao wamefanikiwa kupata kazi hizo

"Nawapongeza kwa kupata kazi katika Halmashauri yetu lakini niwakumbushe kuwa kuna watu wengi ambao waliomba na hawakufanikiwa kupata hivyo Mikataba hii tunasaini hapa muitendee haki na kuacha uzembe au urafiki ambao hauna tija katika taasisi. Kama kuna changamoto usije kulalamika kwangu wakati hujapita kwa Mkurugenzi hapana anza kwanza kwake” alisisitiza Mhe. Mlimba

Aidha Mkurugenzi wa Halmashauri ya Mji Tunduma Philemon Magesa amewaambia Wakandarasi na Mafundi kuwa atakayekiuka mkataba huu basi Halmashauri haitasita kusitisha mkataba na kumpatia mwingine

"Mikataba hii tumesaini Leo hapa wazi kabisa hivyo asitokee mtu kuja kuwakwamisha, Ofisi yangu huwa haiombi hela wala asijetokea mtu kusema katumwa hela na mkurugenzi jiepusheni na matapeli" alisema Mkurugenzi Magesa

Mkandarasi wa kumalizia jengo la Utawala Jaruo karebe wa kampuni la United Brilliant Solutions (T) LTD ya Dodoma amesema kuwa yeye na kampuni lake wapo tayari kufanya kazi usiku na mchana ili kuhakikisha kazi zinaisha kulingana na mkataba

Mikataba minne imesainiwa leo ambayo ni ujenzi wa nyumba ya Mtumishi yenye Gharama ya Tsh. 170,000,000/=, Ujenzi wa jengo la Mkurabita lenye Thamani ya Tsh. 91,000,000/=, ujenzi wa chumba cha upasuaji na wodi Hospitali ya Mji Tunduma Thamani ya Tsh. 500,000,000/= na Utengenezaji wa Vitanda Shule ya Sekondari ya Wasichana Dkt. Samia vyenye Thamani ya Tsh. 53,000,000/=