Kakusanyeni Mapato: Chaurembo

Imewekwa : February 13th, 2024

Benton Nollo na Shadida Salum, TTC

Mkurugenzi wa Halmashauri ya Mji Tunduma, Mariam Chaurembo amewaagiza Watendaji wa Kata na Mitaa kukusanya mapato ya Halmashauri na kusimamia kikamilifu utekelezaji wa miradi ya maendeleo katika maeneo yao.

Chaurembo ametoa agizo hilo wakati wa kikao kazi na Watendaji wa Kata 15 na Watendaji wa Mitaa yote 71 ya Halmashauri hiyo, kilichofanyika kwenye Ukumbi wa Mikutano wa Halmashauri hiyo tarehe 13 Februari 2024.

Chaurembo ameeleza kwamba katika kuhakikisha kuwa zoezi la ukusanyanyi Mapato linafanyika ipasavyo, Halmashauri ya Mji Tunduma inapaswa kuwa na Nanzidata ya Wafanyabiashara wote katika kila mtaa hivyo aliwaagiza Watendaji hao kuwa mpaka kufikia tarehe 29 Feruari 2024 wawe wamesilisha Kanzidata ya Wafanyabiashara ndani ya Kata na Mitaa yao.

“Watendaji ninyi ndiyo nguzo yangu ya kwanza kuliko mtu mwingine yeyote katika ukusanyaji wa mapato…hivyo mnao wajubu mkubwa kuhakikisha kuwa mapato yanakusanywa ipasavyo, kwa katika kila tunachokikusanya, asilimia 60 inarudi kuwahudumia Wananchi katika sekta mbalimbali.” Amesema.

Chaurembo amewataka Watendaji hao kuhakikisha kuwa mapato yote yanakusanywa kwa kutumia PoS na fedha zote zinazokusanywa kupelejkwa Benki kwa wakati na si vinginevyo.

Aidha, katika hatua nyingine Chaurembo amewataka Watendaji hao kusimamia miradi ya maendeleo inayotekelezwa katika maeneo yao kwa kuitembelea miradi hiyo mara kwa mara ili kujionea hatua zote za utekelezaji.

“Nikija kwenye mradi nataka kuona ushiriki wako katika mradi huo na nitakagua kitabu cha eneo la mradi na kitabu cha wageni…nataka nikute vitabu vina saini zenu, umebanwa sana basi angalau kwa wiki uende mara mbili kwenye mradi.” Amesema Chaurembo na kuongeza;

“Tumeagiza pikipiki kadhaa kwa ajili ya Watendaji wa Kata ili kuwarahisishia zoezi la kutembelea na kufuatilia miradi…lakini wakati tunasubiri pikipiki hizo mnatakiwa kuendelea kutekeleza majukumu yenu kama kawaida.”

Pamoja na mambo mengine, Chaurembo amewakumbusha Watendaji hao kutembelea Vituo vya Afya, Zahanati na Shule ili kubaini iwapo kuna changamoto zozote zinazowakabili Wananchi ili waweze kuzitatua kwa wakati.

Mambo mengine aliyoyasisitiza Mkurugenzi huyo ni pamoja na Watendaji hao kutatua migogoro ya ardhi, kufuatilia urejeshaji wa mikopo ya asilimia 10 na kukaa kwenye vituo vyao vya kazi ili wawahudumie Wananchi ipasavyo bila kuomba chochote wala upendeleo.

Aidha, Chaurembo ameishukuru Serikali ya Awamu ya Sita inayoongozwa na Rais, Mhe. Dkt. Samia Suluhu Hassan kwa kuendelea kuipatia fedha za miradi ya maendeleo Halmashauri hiyo kwani kwa kufanya hivyo anatatua changamoto za Wananchi.

Halmashauri ya Mji Tunduma, pamoja na ujenzi wa miradi mbalimbali inayoendelea, pia katika kipindi cha Mwezi Januari 2024 imepokea shilingi bilioni 2.7 kutoka Serikali Kuu kwa ajili ya utekelezaji wa miradi katika sekta ya afya na elimu.

Matukio katika Picha:

Mkurugenzi wa Halmashauri ya Mji Tunduma, Mariam Chaurembo akizungumza wakati wa kikao kazi na Watendaji wa Kata na Mitaa kilichofanyika kwenye Ukumbi wa Mikutano wa Halmashauri hiyo tarehe 13 Februari 2024.

Baadhi ya Wakuu wa Divisheni na Vitengo wakizungumza wakati wa kikao kazi na Watendaji wa Kata na Mitaa kilichofanyika kwenye Ukumbi wa Mikutano wa Halmashauri hiyo tarehe 13 Februari 2024. Kikao hicho kiliongozwa na Mkurugenzi wa Halmashauri ya Mji Tunduma, Mariam Chaurembo.

Baadhi ya Watendaji wa Kata wakizungumza wakati wa kikao kazi kilichofanyika kwenye Ukumbi wa Mikutano wa Halmashauri hiyo tarehe 13 Februari 2024. Kikao hicho kiliongozwa na Mkurugenzi wa Halmashauri ya Mji Tunduma, Mariam Chaurembo na kuwahusisha Watendaji wa Kata na Mitaa wote katikas Halmashauri hiyo.

Baadhi ya Wakuu wa Divisheni na Vitengo na Watendaji wa Kata na Mitaa wakimsikiliza kwa makini Mkurugenzi wa Halmashauri ya Mji Tunduma, Mariam Chaurembo wakati wa kikao kazi na Watendaji wa Kata na Mitaa yote kilichofanyika kwenye Ukumbi wa Mikutano wa Halmashauri hiyo tarehe 13 Februari 2024.