KAMPUNI ZA MBOLEA ZATAKIWA KUHESHIMU MAKUBALIANO KUSAMBAZA MBOLEA ZA RUZUKU

Imewekwa : October 13th, 2022

MKUU wa Mkoa wa Rukwa, Queen Sendiga, leo Oktoba 13 amefunga maadhimisho ya Siku ya Mbolea Duniani na kuzitaka kampuni zilizoingia mkataba wa kuuza mbolea ya ruzuku na serikali  kuzingatia makubaliano ya mkataba huo.

Kauli mbiu iliyobeba maadhimisho hayo yaliyofanyika katika viwanja vya Kimondo wilayani Mbozi  ni Ajenda 10/30: "Matumizi sahihi ya mbolea ya ruzuku kwa kilimo chenye tija", yametoa fursa mbalimbali kwa wananchi hao ikiwemo ununuzi wa mbolea za ruzuku ambapo kwa wananchi walionunua mifuko zaidi ya minne ya mbolea walipata mmoja bure.

Queen Sendiga amesema, kwa kuwa Rais Samia ameamua kuiinua sekta ya kilimo ikiwa pamoja na kuwainua wakulima wote, mbolea ya ruzuku ni njia mojawapo kubwa ya kufanikisha azma hiyo hivyo kampuni za mbolea zinao wajibu wa kufikisha huduma hiyo kwa wakulima kwa ufanisi.

"Rais Samia kupitia Wizara ya Kilimo amefanya mengi makubwa katika kuendeleza sekta hii pamoja na wakulima wenyewe, uamuzi wa mbolea ya ruzuku ni sahihi kwa kuwa unawawezesha wakulima kufanya kilimo chenye tija, kikubwa ni kila mtu kuhakikisha anatimiza wajibu wake ili lengo la kuendeleza kilimo litimie."

Kwa upande wake Mkurugenzi wa Mamlaka ya Udhibiti wa Mbolea Tanzania (TFRA), Stephan Ngailo ametoa wito kwa wadau wote wa tasnia ya mbolea kutoa  ushirikiano ili  kufikisha huduma karibu na wakulima.

"Pelekeni mbolea karibu na maeneo yalipo mashamba ya wakulima mashamba hayako mijini, wakulima wapo vijijini pelekeni mbolea vijijini" Dkt. Ngailo alisisitiza.

Aidha, Dkt. Ngailo amewataka wakulima kujisajili huku wakizingatia utoaji wa taarifa sahihi za ukubwa wa mashamba yao ili waweze kununua mbolea inayotosheleza mahitaji ya shamba vinginevyo watanunua mbolea isiyokidhi mahitaji ya shamba.

"Hakuna ada wala kiingilio kwa ajili ya kwenda kujisajili ada ni mguu wako" alisisitiza  Dkt. Ngailo.