Kikundi cha Vijana Sakasaka Chamaliza Mkopo kwa Wakati

Imewekwa : October 9th, 2023

Benton Nollo, TTC na Agripa Mvela, SJMC UDSM

Kikundi cha Vijana Waendesha Pikipiki cha Sakasaka, Halmashauri ya Mji Tunduma kimefanikiwa kumaliza mkopo wake wa shilingi milioni 16.15 ambazo walikopeshwa na Halmashauri hiyo kupitia mapato ya ndani yanayotokana na asilimia 10 ya Wanawake, Vijana na Watu Wenye Ulemavu kwa mwaka wa fedha 2022/2023.

Kikundi hicho chenye Wanachama sita (6) ambapo leo tarehe 09 Oktoba 2023 baada ya kumaliza mkopo huo ambao waliutumia kununua pikipiki sita, wamekabidhiwa rasmi na Halmashauri Kadi za Umiliki wa pikipiki hizo ambazo kwa sasa ni mali ya Kikundi hicho.

Akizungumza kwa niaba ya Mratibu wa Dawati la Uwezeshaji Wananchi Kiuchumi, Veronica Msemwa wakati wa hafla fupi ya makabidhiano hayo iliyofanyika Makao Makuu ya Halmashauri amesema kikundi hicho kimeonesha uaminifu mkubwa kwani kimekamilisha marejesho kwa kutumia miezi tisa kati ya miezi 12 ya muda wa mkataba wa marejesho.  

“Nitumie nafasi hii kuwapongezeni wanakikundi wote kwa kuwa na nidhamu na mkopo mliouchukua, kwani mlikoposhwa tarehe 23 Desemba 2022 lakini mmeweza kumudu marejesho kwa wakati na mmejitahidi kumaliza mkopo wenu miezi mitatu kabla ya ukomo wa marejesho kwa mujibu wa mkataba…nitoe wito kwa vikundi vingine kuiga mfano wenu kwani kwa kufanya hivyo mnatoa nafasi kwa vikundi vingine navyo kunufaika na mikopo hii.” Amesema Msemwa.

 Kwa upande wake Mwenyekiti wa Kikundi hicho, Jesfard Mwashilindi ameishukuru Halmashauri ya Mji Tunduma kupitia Divisheni ya Maendeleo ya Jamii kwa kuwaamini na kuwakopesha vijana mkopo huo ambao umewafanya ndani ya miezi tisa kuwa wamiliki wa pikipiki ambazo watazitumia kujiingizia kipato na kujikwamua kiuchumi.

...

Matukio katika Picha

Picha zote juu ni wakati wa Hafla ya Makabidhiano ya Hati za Umiliki baada ya Kikundi cha Vijana cha Sakasaka kukamilisha marejesho ya mkopo.