Kukua Kwenu Kiuchumi, Msiache Majukumu ya Umama: DC Mwandobo

Imewekwa : March 1st, 2025

Na Benton Nollo, Tunduma TC

Mkuu wa Wilaya ya Momba, Mhe. Elias Mwandobo ametoa rai kwa Wanawake wa Wilaya hiyo kuwa pamoja na wao kujihusisha na shughuli za kiuchumi na kupata kipato kikubwa, basi hali hiyo isiwafanye kusahau wajibu wao wa malezi katika familia zao.

DC Mwandobo ametoa rai hiyo alipokuwa akizungumza wakati wa maadhimisho ya Siku ya Wanawake Duniani ambayo kwa Halmashauri ya Mji Tunduma yamefanyika katika Hospitali ya Mji Tunduma tarehe 01 Machi 2025.

Mhe. Mwandobo amesema Tunduma ni Mji wa Kibiashara, hivyo jamii hasa akina mama muda wao mwingi wanautumia kujihusisha na biashara zaidi kuliko malezi ya watoto.

"Natambua jukumu la malezi ya watoto ni la baba na mama, lakini niwaombea akina mama zingatieni malezi ya watoto kwa sababu mnali jukumu la kiimani kuwalea watoto...msiwakimbie watoto, msiwatelekeze watoto." Amesema Mhe. Mwandobo na kuongeza;

"Pamoja na kukua kiuchumi msiache majukumu ya umama...najua wapo akina mama ambao wamenufaika na mikopo ya Asilimia Kumi (10%) inayotokana na mapato ya ndani ya Halmashauri, fedha hizo zisitumike kubadirisha mienendo ya familia zenu."

Aidha, Mhe. Mwandobo amewasihi Wanawake kujali afya zao kwa kufanya mazoezi mara kwa mara ili kuepukana na magonjwa yasiyo ya kuambukiza.

"Nitumie nafasi hii kuwapongeza wenzetu wa Tunduma Family Jogging ambao wameongoza jogging leo...ukiwa na afya njema ufanisi katika shughuli zenu za kiuchumi unakuwa mkubwa, hivyo niwasihi kuzingatia mazoezi." Amesema Mhe. Mwandobo.

Siku ya Wanawake Duniani husherehekewa kila mwaka tarehe 08 Machi ambapo kwa Mkoa wa Songwe kwa mwaka huu (2025) maadhimisho hayo yatafanyika wilayani Songwe.

Matukio katika Picha:

(Picha Benton Nollo na Julius Evandino, TTC).