MAADHIMISHO YA SIKU YA MBOLEA DUNIANI KITAIFA YAFANYIKA MKOA WA SONGWE

Imewekwa : October 11th, 2022

Maadhimisho ya mbolea yamefunguliwa na Mkuu wa Mkoa wa Songwe Mhe. Waziri Waziri Kindamba katika Viwanja vya Kimondo – Mlowo, wilayani Mbozi. Maadhimisho ya mwaka huu 2022 yana kaulimbiu isemayo Agenda10/30 “Matumizi sahihi ya mbolea ya Ruzuku kwa kilimo chenye tija” 

Akiongea wakati wa ufunguzi Mhe. Mkuu wa mkoa amewataka TFRA kutoa ufafanuzi juu ya Bei ya Mbolea kwani baadhi ya wakulima wameanza kulalamika kuwa mbolea hazifiki kutokana na wafanyabiashara kushindwa kupeleka maeneo ya vijijini kwani gharama za usafiri zinakuwa kubwa. Mkurugenzi wa TFRA amesema kuwa jambo hilo limeshawafikia na tayari wameanza kuchukua hatua hivyo wakulima wasiwe na wasiwasi

Mhe. Waziri Waziri Kindamba amewaasa wananchi kuwa wazitumie mbolea hizo za ruzuku vizuri kwani nchi zetu za Jirani hazina ruzuku kwa hiyo kuna uwezekano baadhi yetu tukaanza kuuza mbolea hizi nje ya Nchi.

“Ukiuza mbolea unakuwa hujamtendea haki Rais wa Jamhuri ya Muuungano wa Tanzania Mhe. Samia Suluhu Hassan kwa kutoa Bilioni 150 kwa ajili ya mbolea ya Ruzuku hii tunayoipata sasa” alieleza Mhe. Kindamba 

Baada ya Rais kutoa Ruzuku ametutengenezea kitu kizuri katika usalama wa chakula “watu wenye njaa ukianzisha maandamano hawaulizi maandamano ya nini watauliza kunashingapi, Nafsi yenye njaa huona kila kitu kitamu kwani muda huo unaweza kula kitu chochote” alisema RC Kindamba

Nawaasa wakulima tuzitumie mvua zinazonyesha kidogo na Miti ya mkoa wa songwe tuhakikishe haikatwi hovyo pia tupande miti mingi sana na hapa nisema tuu “hatutakuwa na huruma kwa mtu anayeharibu mazingira kwa kukata miti gharama za kurudisha uoto wa asili ni kubwa sana kuliko kuwazuia watu wanaoharibu mazingira”

Baadhi wa kwalima hawazitumii taarifa za hali ya hewa, hivyo kupitia maazimisho haya niwaase mzitumie taarifa hizo tusiishi kwa mazoea.

Pia Mhe. Kindamba alisema Wakulima hatutawapangia bei zalisheni mazao yenu na muuze bei zenu ili kuwaletea faida na kipato kwa familia zenu na Watoto wenu. Asitokee mtu kuwalazimisha kuuza bei ambayo niya hasara kwenu.

Muwatumie wataalamu wa kilimo ili tulime kilimo kwa teknolojia ili tuweze kupata mazao mengi zaidi kwani teknolojia itatusaidia kukuza kilimo chetu.

Nawapongeza sana vijana kwani mmeongezeka sana katika kujikita katika kilimo na hapa ndio tunatakiwa tutumie Teknolojia ili tuweze kupata mazao mengi sana na yenye tija ili vijana hawa wasikate tamaa.