MAAFISA TARAFA, WATENDAJI KATA WAFUNDISHWA MBINU ZA KUWAHUDUMIA WANANCHI

Imewekwa : June 15th, 2023

SONGWE: Maafisa tarafa na watendaji wa Kata wa Mkoa wa Songwe wamefundishwa mbinu mbalimbali za kuwahudumia wananchi kwenye maeneo yao ya kazi katika kikao kazi kilichowakutanisha viongozi hao ngazi ya Kata na Tarafa

Akifungua mafunzo Mgeni rasmi Naibu Katibu Mkuu TAMISEMI, Ofisi ya Rais Tawala za Mikoa na Serikali za Mitaa (OR-TAMISEMI) Sospeter Mtwale ametoa wito kwa Maafisa Tarafa na Watendaji wa Kata kutengeneza mahusiano mazuri kati ya wananchi na Serikali pale wanapotekeleza majukumu yao.

Naibu Katibu Mkuu, Sospeter Mtwale amesema lengo la mafunzo ni kuwajengea uwezo wa kutatua changamoto mbalimbali ambazo hukwamisha kwa kiasi kikubwa ufanis wa kazi za Maafisa Tarafa na watendaji wa Kata.

"Changamoto ya usimamizi usioridhishwa wa miradi ya maendeleo, kutotatuliwa kwa baadhi ya kero katika maeneo yao, kutofuatwa kwa maadili ya kiutumishi, kuwepo kwa migogoro ya kiutendaji na ukosefu wa ubunifu ni baadhi ya changamoto ambazo baada ya mafunzo haya mtakuwa mumepata mbinu za kuzitatua" Naibu Katibu Mkuu (OR TAMISEMI) Sospeter Mtwale.

"Tunategemea baada ya mafunzo haya mtakwenda kufanya kwa ufanisi mkubwa hasa kwenye ukusanyaji mapato ya ndani, kuimalisha Ulinzi na usalama pamoja na kuisemea Serikali kwa mazuri ambayo yanafanywa na Serikali." amesema Mtwale.

Katibu Tawala Mkoa wa Songwe, Bi. Happiness Seneda amesema watendaji wa Kata na Maafisa Tarafa ndio watekelezaji wa shughuli nyingi za Serikali ngazi ya chini, hivyo mafunzo haya yatakwenda kuongeza ufanisi wa kazi.

Mtendaji wa Kata ya Mlowo, Bwn. Peter Nkeka amesema mafunzo yatakwenda kuwajengea uwezo wa kufanya kazi kwa kuboresha utendaji kazi kwenye sheria, taratibu na kanuni za kazi.

Afisa Tarafa wa Songwe, Godwin Kaunda amesema ni furaha kuona wanawezeshwa kwenye mbinu za kuboresha utendaji kazi ambao watakwenda kutimiza lengo la Ofisi ya Rais TAMISEMI kwani tangu 2003 hawajapata mafunzo licha ya mabadiliko ya miongozo mbalimbali hahatimaye leo chini ya uongozi wa Mhe. Dkt. Samia Suluhu Hassan Rais wa Tanzania tumepata mafunzo, tunaishukuru sana Serikali.