MIKOPO YA BILIONI 3.6 KUIBADILISHA TUNDUMA KWA KUWAINUA WANANCHI KIUCHUMI_ Mhe. Silinde

Imewekwa : December 28th, 2022

Mbunge wa Jimbo la Tunduma na Naibu Waziri Ofisi ya Rais Tawala za Mikoa na Serikali za Mitaa (OR-TAMISEMI) Mhe. David Ernest Silinde amesema kuwa sasa anaiona Tunduma inayokwenda kuongozwa na watu wa aina tatu yaani Wanawake, Vijana na Watu wenye Ulemavu kutokana na mikopo inayotolewa na Halmashauri kipitia mapato ya Ndani

Akiongea mapema leo tarehe 28 Disemba 2022 wakati akikabidhi hundi ya Mikopo yenye thamani ya Tsh. 554,300,000/= kwa vikundi vya Wanawake, Vijana na Watu wenye Ulemavu, Mhe. Silinde amesema kuwa mapato ya Halmashauri ya Mji Tunduma yamekuwa maradufu na hii ni kutokana na udhibiti wa mianya ya ufujaji wa Mapato na kubuni vyanzo vipya vya kukusanya mapato ndani ya Mji wa Tunduma

Mhe. Silinde ameendelea kumshuruku Rais wa Jamhuri ya Muungano wa Tanzania Mhe. Dk. Samia Suluhu Hassan kwa jitihada kubwa anazoendelea kuzifanya za kuhakikisha asilimia kumi (10%) ya makusanyo ya kila Halmashauri nchini lazima itolewe mikopo kwa wananchi ili kujikwamua kiuchumi

“Mwaka huu wa fedha Halmashauri imeweza kutenga Shilingi 732,597,046.00, kwa kipindi cha Julai – Disemba 2022 Halmashauri imetoa kiasi cha shilingi 1,104,300,000.00 ikiwa kiasi cha shilingi 650,000,000.00 ni mapato ya ndani na kiasi cha Shilingi 454,300,000.00 kutoka fedha za marejesho” alisema Mhe. Silinde  

Kwa upande wake Mkuu wa Divisheni ya Maendeleo ya Jamii Bi. Mwanaisham Shemaghembe amesema Halmashauri imejipanga kuhakikisha kuwa kila pesa inayokusanywa basi 10% inatengwa kwa ajili ya mikopo ya Wanawake, Vijana na Watu wenye Ulemavu

“Nipende tu kuwasitiza kutii mikataba kwa kuzingatia vipengele vyote na kuhakikisha kuwa mmetekeleza miradi mliopanga ili kukuza kipato cha mmoja mmoja, kipato cha familia na kipato cha kikundi kwa maslahi mapana ya Halmashauri na Nchi kwa ujumla” alisisitiza Bi. Mwanaisham

Naye Mwenyekiti wa Halmashauri ya Mji Tunduma Mhe. Ayubu Mlimba amesema kuwa Halmashauri ya Mji Tunduma kupitia Baraza la madiwani kwa kuwasaidia wananchi imeweza kutekeleza Agizo la Serikali la kutenga Asilimia 10% ya mapato ya ndani kwa ajili ya kuwezesha vikundi vya wanawake (4%), Vijana (4%) na watu wenye ulemavu (2%).

“Niwaombe mikopo hii ambayo mnaenda kusaini mikataba leo mrejeshe kwa wakati ili Halmashauri iendelee kuwaamini na kuendelea kuwapa mikopo Zaidi kwani mikopo ni endelevu na kila mwaka inatengwa kwa ajili ya vikundi vya wanawake, vijana na wenye ulemavu na tunataka kama ukikopa ukarejesha bila shida mkopo ujao tukupatie mara mbili ya ulichopewa sasa” alisisitiza Mhe. Mlimba

Hadi kufikia Septemba 2022 Halmashauri ya Mji Tunduma imeweza kutoa jumla ya Tsh 3,643,463,622.00 kwa vikundi vya Wanawake 178, Vijana 112, na Wenye ulemavu 42 kuanzia mwaka wa Fedha 2015/2016 hadi 2021/2022