Mkataba Ujenzi Jengo Jipya Hospitali ya Mji Tunduma Wasainiwa

Imewekwa : September 26th, 2024

Mkataba Ujenzi Jengo Jipya Hospitali ya Mji Tunduma Wasainiwa

Na Benton Nollo, TTC.

Halmashauri ya Mji Tunduma imeingia Mkataba na Mkandarasi Hamerkop International Limited wa Ujenzi wa Jengo Jipya (Block B) katika Hospitali ya Mji Tunduma, katika hafla fupi iliyofanyika ofisini kwa Mwenyekiti wa Halmashauri hiyo tarehe 26 Septemba 2024.

Akizungumza mara baada ya tukio la kusaini mkataba huo, Mkurugenzi wa Halmashauri ya Mji Tunbduma, Mariam Chaurembo amesema ujenzi wa Jengo hilo utagharimu shilingi bilioni 2.3 ambazo ni fedha kutoka Serikali Kuu.

Chaurembo amesema mradi huo utatekelezwa kwa muda wa siku 270 na baada ya muda huo kuisha Mkandarasi atapaswa kukabidhi jengo likiwa limekamilika.

Kwa upande wake Mwenyekiti wa Halmashauri ya Mji Tunduma, Mhe. Ayub Mlimba ameishukuru Serikali ya Awamu ya Sita inayoongozwa na Rais Samia Suluhu Hassan kwa kuipatia Halmashauri hiyo kiasi hicho cha fedha kwa ajili ya kuongeza miundombinu katika Hospitali ya Mji Tunduma ambayo ni tegemeo kwa Wananchi wa Mji huo.

Aidha, amewataka Wataalam kusimamia kikamilifu hatua zote za ujenzi wa jengo hilo ili thamani ya fedha ionekane kwa sababu fedha zinazoletwa na Serikali ni matokeo ya kodi wanazolipa Wananchi.   

Mkataba huo umesainiwa na kushuhudiwa na Wajumbe wa Kamati ya Fedha na Utawala pamoja na Wajumbe wa Timu ya Menejimenti ya Halmashauri hiyo.

Matukio katika Picha: