MLANGO WA OFISI YA MKURUGENZI UPO WAZI KARIBUNI

Imewekwa : April 24th, 2023

Na Willia Maganga - Tunduma TC

 Mkurugenzi wa Halmashauri ya Mji Tunduma Philemon Magesa ameitisha kikao na Wazabuni wa Halmashauri ya Mji Tunduma na kusikiliza kero mbalimbali zinazowakumba na kuzitatua ili kuendela kutoa huduma bora

Mkurugenzi Magesa amesema baada ya kusikia malalamiko mtaani ya baadhi ya Wazabuni kutokulipwa ameamua kuwaita Wazabuni wote na kuwasikiliza ili kujua changamoto wanayokumbana nayo wanapotoa Huduma katika Halmashauri ya Mji Tunduma

Katika kikao hicho kilichofanyika katika Ukumbi wa ofisi ya Mkurugenzi aliwataka kila Mzabuni aseme changamoto yoyote anayokumbana nayo wakati wa kutoa huduma au wakati wa kupatiwa malipo yake

Bwana Manase Mwaselema (TORONTO) alimweleza Mkurugenzi huyo kuwa baadhi ya Malipo yao yamekuwa yakichelewa kutokana na matatizo ambayo wao hawayajui na kuomba ufafanuzi kwa mkurugenzi ili wajue tatizo ni nini hasa wakati huduma wamezitoa.

“Sisi watoa huduma wako tumekuwa tunaumia sana pale tunapoona malipo yetu yanachelewa na tukiwauliza baadhi ya wasaidizi wako wanasema tusubili wakati muda unaenda na sisi ni wafanya biashara hivyo tunaomba malipo yetu yawe yanawahi ili tuweze kujikwamua kulipa mikopo benki” alisisitiza Bwana Mwaselema

Baada ya kusikiliza kero hizo Mkurugenzi waliwahakikishia kuwa madeni yao yote yatalipwa na iwapo kama kuna changamoto yoyote wanayoipata toka kwa wasaidizi wake basi wasisite kuwasiliana naye ili kutatua jambo hilo kwa haraka

“Mzabuni usinung'unike pembeni nipatie taarifa nani anakwamisha utoaji wa Huduma katika Halmashauri ya Mji Tunduma ili nichukue hatua, ukikaa kimya mimi nakuwa najua mambo yanaenda vizuri” alisema Mkurugenzi Magesa

Kwa upande wake Mhandisi wa Halmashauri ya Mji Tunduma Eng. Ally Tinga aliwakumbusha watoa huduma hao kuzingatia ubora wa vifaa na huduma wanazotoa katika taasisi ili kuongeza ufanisi wa kazi

“Niwakumbushe kuendelea kutoa huduma bora kwani mradi ukiwa mzuri ni heshima kwenu ninyi mnaotoa huduma sasa kuna wengine mmekua mnataja bei ya vifaa ya juu sana ambayo kiuhalisia sio sawa, niombe mrekebishe hayo ili tuendee kufanya kazi vizuri huku tukikamilisha miradi ya serikali kikamilifua” alisisitiza Eng. Tinga