Msiingie Katika Vishawishi Vitakavyoharibu Ndoto Zenu: Mnzava

Imewekwa : September 4th, 2024

Na Benton Nollo, TTC

Kiongozi wa Mbio za Mwenge wa Uhuru Kitaifa 2024, Godfrey Elliakimu Mnzavva amewataka Wanafunzi wa Shule ya Sekondari Mpemba kuzingatia masomo na kuepuka vishawishi ambavyo vinaweza kuwaharibia ndoto zao.

Mnzava ameyasema hayo tarehe 04 Septemba 2024 wakati wa Mbio za Mwenge wa Uhuru 2024 ambao ulifika shuleni hapo kwa ajili ya kukagua Klabu ya Wapinga Rushwa na Dawa za Kulevya.

“Sisi tunawatakia heri kwenye masomo yenu, lakini pia mnapoendelea kujifunza masuala haya ya kuzuia na kupambana na Rushwa lakini pia Dawa za Kulevya shikeni sana masomo yenu, msiingie katika vishawishi vyovyote vile ambavyo vitaharibu ndoto zenu.” Amesema Mnzava na kuongeza;

“Msijihusishe kwa namna yoyote ile hata kujaribu kwenye matumizi ya Dawa za Kulevya…kwa sababu madhara yake ni makubwa na ndoto zenu zitakatishwa kabisa, kwa sababu utaingia kidogo kidogo baadaye unakuwa mraibu kabisa wa matumizi ya Dawa za kulevya, halafu wazazi wamekuleta hapa ili usome na walimu wanaendelea kukulea na jamii inakutegemea na Mheshimiwa Rais ameendelea kujenga miundombinu mizuri sana ya elimu ili ninyi mpate nafasi nzuri ya kujifunza lakini siyo mambo mengine.

Kiongozi huyo amesema amefarijika kuona kuwa Klabu hiyo ilizinduliwa mwaka 2010 na Kiongozi wa Mbio za Mwenge wa Uhuru Kitaifa wakati huo Dkt. Nassoro Ally Matuzya ikiwa na Wanachama 81 na mpaka sasa ina Wanachama 350 ambapo Wavulana ni 173 na Wasichana ni 177 ikiwa hai na wanaendelea kujifunza masuala ya Kuzuia na Kupambana na Rushwa lakini sasa imeongezeka kipengele cha Mapambano dhidi ya Dawa za Kulevya.

“Dhamira ya Serikali ni ile ile, kwamba Klabu hizi zitaendelea kutusaidia kujenga na kutengeneza vijana wazuri ambao watakuwa wazalendo kwa taifa lao, watakaokuwa wanaendelea kuipenda haki kutoka ndani ya mioyo yao kwa sababu ni mambo ambayo watakuwa wameishi nayo kwa muda mrefu na kujifunza angali wakiwa wadogo.” Amesema Mnzava na kuongeza;

“ Ndiyo maana Klabu hizi zinaanzishwa katika ngazi zote za masomo, shule za msingi, sekondari, vyuo vya kati na vyuo vikuu ili kesho tupate Watumishi waadilifu wenye kupenda maslahi mapana ya taifa hili bila kujitanguliza wao wenyewe, ikiwa ni kwenye sekta binafsi ama kwenye sekta ya umma lakini hata wakiwa viongozi watakuwa wanatoa maamuzi ambayo yana maslahi mapana sana ya taifa kwa sababu wameshaelewa mapema kabisa ya kwamba rushwa ni adui wa haki na rushwa ni adui wa maendeleo lakini pia ni kosa kisheria.” Amesisitiza Mnzava.

Mnzava ameikumbusha jamii kuwa mapambano dhidi ya Rushwa si jukumu la Serikali kupitia TAKUKURU peke yake bali ni jukumu la kila Mtanzania kwa sababu athari zake zinamgusa kila mtu kwa namna tofauti tofauti.

Matukio katika Picha:

Kiongozi wa Mbio za Mwenge wa Uhuru Kitaifa 2024, Godfrey Elliakimu Mnzava akizungumza na Wanafunzi wa Shule ya Sekondari Mpemba wakati wa Mbio za Mwenge wa Uhuru 2024 ambao ulifika shuleni hapo kwa ajili ya kukagua Klabu ya Wapinga Rushwa na Dawa za Kulevya tarehe 04 Septemba 2024 .

Kiongozi wa Mbio za Mwenge wa Uhuru Kitaifa 2024, Godfrey Elliakimu Mnzava (kushoto) akimkabidhi Hati ya Ukaguzi wa Klabu ya Wapinga Rushwa na Dawa za Kulevya Mwenyekiti wa Klabu hiyo Shule ya Sekondari Mpemba, Sophia Bilingi (kulia) wakati wa Mbio za Mwenge wa Uhuru 2024 ambao ulifika shuleni hapo kwa ajili ya kukagua Klabu hiyo tarehe 04 Septemba 2024 .

Mwenyekiti wa Klabu ya Wapinga Rushwa na Dawa za Kulevya Shule ya Sekondari Mpemba, Sophia Bilingi akisima taarifa ya Klabu hiyo kwa Kiongozi wa Mbio za Mwenge wa Uhuru Kitaifa 2024, Godfrey Elliakimu Mnzava (hayupo pichani) wakati wa Mbio za Mwenge wa Uhuru 2024 ambao ulifika shuleni hapo kwa ajili ya kukagua Klabu hiyo tarehe 04 Septemba 2024 .

Kiongozi wa Mbio za Mwenge wa Uhuru Kitaifa 2024, Godfrey Elliakimu Mnzava (wa pili kulia) akipokea taarifa ya Klabu ya Wapinga Rushwa na Dawa za Kulevya Shule ya Sekondari Mpemba kutoka kwa Mwenyekiti wa Klabu hiyo Sophia Bilingi (kushoto) wakati wa Mbio za Mwenge wa Uhuru 2024 ambao ulifika shuleni hapo kwa ajili ya kukagua Klabu hiyo tarehe 04 Septemba 2024 .

Mkuu wa Wilaya ya Momba, Mhe. Elias Mwandobo akizungumza awali kumkaribisha Kiongozi wa Mbio za Mwenge wa Uhuru Kitaifa 2024, Godfrey Elliakimu Mnzava (hayuo pichani) ili azungumze na Wanafunzi wa Shule ya Sekondari Mpemba wakati wa Mbio za Mwenge wa Uhuru 2024 ambao ulifika shuleni hapo kwa ajili ya kukagua Klabu ya Wapinga Rushwa na Dawa za Kulevya tarehe 04 Septemba 2024 .