Nendeni Mkajiandikishe Muwe Sehemu ya Uamuzi wa Busara: RC Chongolo

Imewekwa : October 19th, 2024

Benton Nollo na Shadida Salum, TTC

Mkuu wa Mkoa wa Songwe, Mhe. Daniel Chongolo amewahamasisha Wananchi wa Mji wa Tunduma kujitokeza kwa wingi kujiandikisha katika Orodha ya Wapiga Kura ili wapate sifa za kushiriki Uchaguzi wa Serikali za Mitaa utakaofanyika tarehe 27 Novemba 2024.

Chongolo ameyasema hayo alipokuwa akizungumza na Wananchi wa Mji wa Tunduma tarehe 19 Oktoba 2024 mara baada ya kushiriki na kuhitimisha mazoezi ya mbio za mwendo wa pole na matembezi maalum yaliyoratibiwa na uongozi wa mkoa huo maarufu kama Songwe Route Match 2024.

Akizungumza katika Uwanja wa Shule ya Msingi Tunduma yalipofanyika mazoezi ya viungo na michezo mbalimbali, Chongolo ameitaka jamii kuona umuhimu wa kushiriki zoezi la kujiandikisha kwa wale wenye sifa za kufanya hivyo ili kupata fursa ya kugombea nafasi za Uongozi ngazi ya Mtaa pamoja na kupiga kura.

"Niwaombe sana Wanatunduma, ni muhimu sana, nendeni mkajiandikishe na kujiorodhesha kwenye Daftari la Orodha ya Wapiga Kura ili muwe sehemu ya uamuzi wa busara ya kuwapata viongozi watakaotuongoza kwa miaka mitano." Amesema Mhe. Chongolo na kuongeza;

"Miaka mitano ni miaka mingi, tusifanye uamuzi kwa kukurupuka, tusifanye uamuzi kwa kushawishiwa vinginevyo, tufanye uamuzi kwa kutambua na kujua tunachokitaka na kuamua ili tukipate kupitia uongozi tutakaouweka kuendelea kutuongoza kwa kipindi cha miaka mitano."

Mhe. Chongolo amesema msingi wa Serikali ya miaka mitano inayokuja, unajengwa kwenye Uchaguzi huo wa Serikali za Mitaa, hivyo amewasihi Wananchi wasiache kutumia fursa hiyo vizuri kwa Uandikishaji umeanza tangu tarehe 11 Oktoba 2024 na mwisho ni tarehe 20 Oktoba 2024.

"Sote ni mashahidi wa mambo makubwa ya maendeleo yanayofanywa na Serikali yetu ya Awamu ya Sita inayoongozwa na Rais wetu Samia Suluhu Hassan, niwaombe twendeni tukashiriki zoezi hili kikamilifu, ili tuwe sehemu ya maamuzi ya busara, tusiache tukaamriwa, tuwe sehemu ya maamuzi." Amesema Mhe Chongolo.

Aidha, Mhe. Chongolo ameitaka jamii kuwa utamaduni wa kufanya mazoezi ya mara kwa mara ili wawe na afya bora na kujikinga na magonjwa yasiyo ya kuambukiza ambayo amesema ndiyo yanayoongoza kwa vifo nchini.

Matukio katika Picha: