NIMERIDHISWA NA UJENZI WA SHULE YA MSINGI YA GHOROFA INAYOJEGWA KWA MAPATO YA NDANI TUNDUMA_Majaliwa

Imewekwa : February 14th, 2023

Waziri Mkuu, Mhe. Kassim Majaliwa amekagua ujenzi wa jengo la ghorofa katika shule ya mpya ya Msingi Haisoja unahusisha vyumba kumi vya madarasa, ofisi nne za walimu na matundu 20 ya vyoo vya wanafunzi na matundu 4 ya vyoo vya walimu katika Halmashauri ya Mji Tunduma.

Waziri Mkuu amefanya Ukaguzi huo leo tarehe 14 Februari 2023 unaoendelea kutekelezwa katika kata ya Songea, Halmashauri ya Mji wakati mwendelezo wa ziara yake mkoa wa Songwe.

Mradi huo wa ujenzi wa shule unatekelezwa kwa fedha za mapato ya ndani ya halmashauri ya mji na michango ya wananchi ambapo umeanza kutekelezwa tarehe 21/12/2021 na unatarajiwa kukamilika tarehe 28/02/2023.

Mradi huo hadi kukamilika unatarajia kugharimu shilingi milioni 830, ambapo mpaka sasa umepokea kiasi cha shilingi milioni 821 za Mapato ya Ndani na shilingi milioni 9 ikiwa ni Michango ya Wananchi.

Wakati akiongea na Wananchi, Waziri Mkuu amesema Mheshimiwa Rais, Dkt. Samia Suluhu Hassan anaendelea kuimarisha sekta ya elimu kwa kuhakiksha kila Mtoto aliyefikisha umri wa kwenda shule anaanza masomo.

“Hongera sana Mkurugenzi wa Halmashauri ya mji Tunduma kwa ubunifu huu kwa kushirikiana na madiwani, mradi huu ni mfano wa kuigwa na halmashauri nyingine nchini, hapa naona kabisa matumizi ya pesa yanaendana na kinachoonekana na wananchi wananufaika kwa kinachokusanywa na halmashauri” alisema Mhe. Kassim Majaliwa

Waziri Mkuu amesema Mheshimiwa Rais amendeleza sera ya elimu bure kuanzia darasa la awali mpaka Kidato cha sita na Kuzuia Michango ya ovyo ovyo kwa wazazi.

Kwa upande wake, Naibu Waziri Ofisi ya Rais -TAMISEMI, Mhe. David Silinde amesema moja ya mkakati wa Halmashauri ya Mji Tunduma ni kujenga madarasa kwa kutumia mapato ya ndani ili kupunguza mrundikano wa wanafunzi darasani na kuongeza ufanisi katika ufundishaji.