RPC Mallya: Kutengeneza Fedha Bandia ni Uhujumu Uchumi

Imewekwa : October 3rd, 2023

Na William Maganga, Tunduma TC

Jeshi la Polisi Mkoa wa Songwe linawashikilia watuhumiwa wawili kwa kosa la kutengeneza noti Bandia za Nchi ya Zambia.

Hayo yamethibitishwa na Kamanda wa Jeshi la Polisi Mkoa wa Songwe, ACP Theopista Mallya alipokuwa akizungumza na vyombo vya habari tarehe 03 Oktoba 2023 katika ofisi za jeshi hilo zilizopo Vwawa wilayani Mbozi.

Alisema watuhumiwa hao wamekamatwa tarehe 19 Septemba 2023 Mtaa wa Nazareth, Kata ya Mwakakati katika Halmashauri ya Mji Tunduma, Wilaya ya Momba wakiwa na noti 12 za nchi ya Zambia zenye thamani ya kwacha 50 kila moja.

"Waliokamatwa ni wanaume wawili mmoja mwenye umri wa miaka 48 (Mzambia) mkulima mkazi wa Mpulungu Zambia na mwenzake ana umri wa miaka 59 (Mtanzania) mkulima mkazi wa Msongwa Tunduma.” Amesema RPC Mallya.

Kamanda Mallya amesema watuhumiwa hao pia wamekamatwa na karatasi 10 zenye ukubwa wa A4 zikiwa zimechapishwa kwacha 50 kwa idadi ya noti 36 ikiwa ni pamoja na karatasi ya A4 moja iliyochapishwa noti 4 zenye thamani ya kwacha 100.

Aidha, watuhumiwa hao walikamatwa wakiwa na visu viwili, kikubwa kimoja na kidogo kimoja cha kukunja, mkasi mmoja wa kukatia karatasi pamoja na vitambulisho viwili vya Taifa la Zambia vyenye namba Z.17714847 na Z.1600353.

Mkurugenzi wa Benki Kuu (BOT) Tawi la Mbeya, James Machemba alisema tukio hilo la utengenezaji fedha za bandia ambazo hutumika katika mpaka huo kuwa ni uhujumu uchumi ambapo huathiri uchumi wa mwananchi mmoja na taifa kwa ujumla.

Mkurugenzi huyo amesema BoT imekuwa ikishirikiana na Serikali ya Zambia kutoa elimu kwa Wananchi na Wafanyabiashara wanaofanya biashara za kubadilishana fedha ili waweze kuzitambua fedha kwa uhalisia wake.

----

Matukio Katika Picha

Picha zote juu ni matukio mbalimbali wakati na baada ya Kamanda wa Jeshi la Polisi Mkoa wa Songwe kuzungumza na vyombo vya habari tarehe 03 Oktoba 2023.